नागरिकहरूको जीवनस्तर उकास्न पुँजीवादी व्यवस्था : गगन थापा

काठमाडौँ- नेपाली काँग्रेसका महामन्त्री गगनकुमार थापाले नागरिकहरूको जीवनस्तर उकास्ने उदारवादी र पुँजीवादी व्यवस्था भएको बताएका छन् । 

नेपाली काँग्रेस पुस्तकालय तथा पार्टी अध्ययन स्रोत केन्द्रीय विभागद्वारा यहाँ आयोजित बेलायती संसदीय लोकतन्त्र र लेबर पार्टी सञ्चालन प्रणाली सम्बन्धमा लेबर पार्टीका नेता डा. बच्चुकैलाश कैनीसँगको अन्तरक्रियामा महामन्त्री थापाले नेपाली काँग्रेसले तल्लो तहका नागरिकको जीवनस्तर उकास्न उदारवादी र पुँजीवादी व्यवस्थाका पक्षपोषण गरिरहेको बताए । 

“हामीले खोजेको समुन्नत नेपाल हो, हामी पुँजीवादी अर्थ व्यवस्थामा विश्वास गर्छौँ, नाफालाई अपराध मान्दैनौँ, तल्लो तहमा रहेका नागरिकहरूलाई माथि उकास्न चाहन्छौँ, हामीले चाहेको व्यवस्थित प्रणालीमा कसैले पासपोर्ट र लाइसेन्स पाउन राजनीतिक दलको सदस्य हुनुपर्दैन”, उनले भने ।

नेपालले अनुसरण गरेको प्रणाली भनेको बेलायती संसदीय प्रणाली भएको उल्लेख गर्दै उनले संसदीय प्रणालीमा आफ्नो ठूलो विश्वास रहेको बताए । उनले लेबर पार्टीसँग नेपाली काँग्रेसको भगिनी सम्बन्ध रहेको उल्लेख गर्दै पुराना पार्टीहरू संकटमा भएको अवस्थामा बेलायतमा लेबर पार्टी पनि संकटमा छ भन्ने देखिएको बताए । 

सन् १९९५ मा लेबर पार्टीले बेलायतमा निजी सम्पत्तिको विषय र उदारवादी विषयका कुरामा उत्साहित हुँदै गर्दा आफूहरूले पनि त्यहीँ विषय उठाएको बताए । “बेलायतको लेबर पार्टीले तीन वटा निर्वाचन जितेर आफ्नो धार कायम गरेको छ । हामीले पनि २०४८ सालमा जितेपछि उदारवादी नीति ल्याएकै हो, ग्रामीण क्षेत्रमा शिक्षा, स्वास्थ्य र सडकका क्षेत्रमा पर्याप्त बजेट गएकै हो,” उनले भने ।

बेलायतको लेबर पार्टीका नेता डा. बच्चुकैलाश कैनीले आफू सन् २०१२ मा लेबर पार्टीसँग जोडिएको बताए । नेपाली मूलका कैनी प्रतिष्ठित शैक्षिक तथा स्वास्थ्य व्यवस्थापन विज्ञ र राजनीतिकर्मी हुन्। उनले कुनै समय नेविसंघ तनहुँको सचिव समेत भएका थिए ।