पूर्वराष्ट्रपति भण्डारीले भने जस्तै हुँदैछ, अब एमालेको भावी अध्यक्षको लयमा

काठमाडौं– पूर्वराष्ट्रपति विद्यादेवी भण्डारीले केही समयअघि भने जस्तै हुन थालेपछि नेकपा एमालेको भावी अध्यक्षको लयमा फर्किएको स्वभाविक अनुमान गर्न थालिएको छ।

केही समयअघि नेपालखबरमा अन्तरवार्ता दिएकी उनले ‘कार्यकर्ताले चाहेको खण्डमा नेतृत्वमा आउने’ बताएकी थिइन्। योसँगै उनले राजनीतिमा सक्रिय हुनका लागि चीन र भारतको भ्रमण सुरुमा गर्ने बताएकी पनि थिइन्। 

सोही भनाई जस्तै उनी एमालेको स्वामित्वमा चीन भ्रमणका लागि आइतबार प्रस्थान गरेकी छन्। उनी चीनबाट फर्किएपछि भारत भ्रमणमा जाने तयारी समेत भैरहेको उच्च स्रोतले जनाएको छ।

एमालेको उपाध्यक्ष रहँदा राष्ट्रपतिमा दुई पटक निर्वाचित भएकी भण्डारी कार्यकाल सकिएपछि सदस्यता नवीकरण गरी सक्रिय भएकी हुन्।

अहिले अध्यक्ष तथा प्रधानमन्त्री केपी शर्मा ओली क्याम्पबाट छुटेका कतिपय एमाले नेताले पनि भण्डारीलाई अगाडि बढाउन खोजेका छन्।

भण्डारीको चीन भ्रमणको स्वामित्व पार्टीले लिनु पनि उनको सक्रियताको एउटा प्रमाण हो। ‘उहाँ सक्रिय हुन चाहे अध्यक्षको दाबेदार नै हो। अन्यभन्दा सिनियर लिडर नै हो’, उच्च स्रोतले भन्यो,‘राजनीतिमा उहाँले कुलिङ पिरियड पनि सक्किएको बताउनुभएको छ।’