कांग्रेसभित्र उठ्यो गृहमन्त्री लेखकको राजीनामा, ठूला नेताले दिए यतिसम्म भनेछन्ः जनमत संग्रह पनि मागे

काठमाडौं– भिजिट भिसा प्रकरणमा विवादमा तानिएका गृहमन्त्री रमेश लेखकले राजीनामा दिनुपर्ने माग कांग्रेसभित्र उठेको छ।

संस्थापन पक्षका लेखकको राजीनामा इतर समूहका ठूला नेता शेखर कोइरालाले माग गरेका हुन्। 

कोइरालाले गृहमन्त्री लेखकलाई नैतिकताको आधारमा राजीनामा दिन सुझाव दिएका हुन्। उनले राजीनामा दिएर छानबिनका लागि मार्गप्रशस्त गर्न सुझाव दिएका छन्। 

शनिबार विराटनगर विमानस्थलमा सञ्चारकर्मीसँग कुरा गर्दै कोइरालाले अध्यागमन विभागमा भएको भ्रष्टाचारका विषयमा कुरा उठिसकेपछि नैतिकताको आधारमा गृहमन्त्रीले राजीनामा दिनु उपयुक्त हुने बताएका हुन्। 

कोइरालाले विगतमा पनि केही मन्त्रीहरूले राजीनामा दिएर छानबिनमा सघाएको र मन्त्री लेखकले राजीनामा दिँदा उनकै नैतिकतामा सघाउ पुग्ने बताए।

हिन्दू राष्ट्रको माग उठिरहेका सन्दर्भमा नेता कोइरालाले जनमत संग्रह आवश्यक रहेको बताए। उनले लोकतन्त्रलाई मुख्य लक्ष्य बनाउने राजनैतिक दलहरूले जनमतसंग्रहबाट डराउन नहुने जिकिर गरे। कांग्रेस, एमाले र माओवादी एकजुट भएर हिन्दु राष्ट्र र संवैधानिक राजसंस्थाबारे जनमतसंग्रह गराउन सक्नुपर्ने उनको भनाइ छ।