सशस्त्रका असई छत्याललाई पनि आईजी अर्यालको न्याय, बढुवा गरी सईको फूली लगाइदिए

काठमाडौं– सगरमाथाको सफल आरोहण गरेका सशस्त्र प्रहरी सहायक निरिक्षक (असई) दन्तबहादुर छत्याललाई महानिरिक्षक (आईजी) राजु अर्यालले न्याय गरेका छन्। 

उनको सईमा बढुवा गरी दज्र्यानी चिन्ह (फूली) लगाइदिएका हुन्। 

साहसिक काम गरेको भन्दै सशस्त्र प्रहरी बलले छत्याललाई प्रहरी सहायक निरीक्षक (असई) बाट सशस्त्र प्रहरी नायब निरीक्षक (सई) पदमा बढुवा गरेको थियो।

अर्यालले बिहीबार उनलाई दज्र्यानी चिन्ह प्रदान गरेको सहप्रवक्ता एवं डिएसपी शैलेन्द्र थापाले जानकारी दिए। 

अर्यालले सशस्त्र प्रहरी कर्मचारीहरूले सगरमाथा आरोहण गर्नसक्छु भन्ने भावना लिई साहसिक कार्यगर्दा सबैमा हौसला मिल्ने बताए। यसले व्यक्तिको मात्रै नभई देश र संगठनको नाम समेत उच्च रहने बताए। 

उनले आगामी वर्षदेखि सशस्त्र प्रहरी बल नेपालका सबै प्रदेश कार्यालयहरूमा हिमाल आरोहण गर्ने अभियान नै सुरू गर्ने बताए। 

यसअघि नेपाल प्रहरीकी असई रहँदा सगरमाथाको सफल आरोहण गरेकी कुञ्छाङ छोपेल शेर्पालाई पनि सईमा बढुवा गरिएको थियो। आईजी दीपक थापाले उनको बढुवा गरेका हुन्। 

सशस्त्रका छत्यालले जेठ ४ गते बिहान ९ः२० बजे सगरमाथाको चुचुरोमा ‘सगरमाथा संवाद’ र सशस्त्र प्रहरी बल नेपालको झण्डा फहराएका थिए।