भारत र पाकिस्तानको युद्धविरामपछि रुसबाट आयो खुशीको खबर

काठमाडौं– भारत र पाकिस्तानले दुई दिनको दोहोरो संघर्षका क्रममा नै युद्धविराममा सहमति जनाएको छ। यो सहमतिसँगै दक्षिण एसीयाली मुलुकमा शान्ति कायम भएको बखत युद्धमा रहेको रुसले पनि खुशीको खबर दिएको छ। 

लामो समयदेखि युक्रेनसँग गहिरो संघर्षमा रहेको रुसका राष्ट्रपति भ्लादिमिर पुटिनले पनि शान्ति वार्ता हुन सक्ने बताएका छन्। 

बीबीसीका अनुसार रुसी राष्ट्रपति पुटिनले युक्रेनसँग सिधा वार्ताको आह्वान गरेका हुन्। उनले त्यो ढिलो नगरीकनै, छिटोमा १५ मे मा गर्नु पर्ने बताए।

‘हामी गम्भीर वार्ता खोजिरहेका छौँ। द्वन्द्वका मूल कारण हटाउन र दिगो तथा बलियो शान्तितर्फ अघि बढ्नका लागि’, उनले शनिवार राति अबेर गरी क्रेमलिनबाट प्रसारित दुर्लभ टेलिभिजन सम्बोधनमा भने।

यूकेका प्रधानमन्त्री किअर स्टार्मर, फ्रान्सका राष्ट्रपति एमानुएल माक्रोँसहितका युरोपेली नेताहरू युक्रेन पुगेर निःसर्त ३० दिने युद्धविराममा सहमत हुन रुससँग आग्रह गरेको केही घण्टामा पुटिनको यो भनाइ आएको हो।

जबाफमा क्रेमलिन प्रवक्ता दिमित्री पेश्कोभले मस्कोले यसबारे सोच्नु पर्ने भए पनि. दबाव दिनु बेकार रहेको चेतावनी दिएका थिए।

आफ्नो बयानमा पुटिनले वार्ताका क्रममा रुस र युक्रेन नयाँ युद्धविरामहरूमा सहमत हुन सक्षम हुन सक्ने कुरालाई अस्वीकार गरेका छैनन्।

पुटिनले टर्कीको इस्तानबुलमा उक्त वार्ता प्रस्ताव गरेका छन्।

रुसी राष्ट्रपतिले आइतवार टर्कीका राष्ट्रपति रेजेप ताय्यिप एर्दोआनसँग यसबारे कुरा गर्ने बताए। किएभले पुटिनको प्रस्तावमा कुनै टिप्पणी गरेको छैन।
यसअघि शनिवार युरोपेली नेताहरूले युक्रेनको राजधानी भ्रमण गरेका थिए।

त्यहाँ उनीहरूले सोमवारदेखि सुरु हुने एक महिना लामो युद्धविराममा युक्रेनसँग सहमत हुन मस्कोलाई आह्वान गरेका थिए।