भारत र पाकिस्तानबीच सैन्य टकराव बढेको भन्दै रुस, फ्रान्स र बेलायत चिन्तित

काठमाडौँ  -भारत र पाकिस्तानबीच सैन्य टकराव बढ्ने भन्दै रुस, फ्रान्स र बेलायतले चिन्ता व्यक्त गरेका छन् ।

रुसको विदेश मन्त्रालयले विज्ञप्ति जारी गर्दै 'गहिरो हुँदै गएको सैन्य टकरावको बारेमा गहिरोरुपमा चिन्तित छ' भनेको छ ।

विज्ञप्तिमा दुवै देशलाई संयम अपनाउन आग्रह गरिएको छ । विज्ञप्तिमा भनिएको छ- 'रूसले सबै प्रकारका आतंकवादको कडा शब्दमा निन्दा गर्दछ र यस दुष्टतासँग प्रभावकारी रूपमा लड्न सम्पूर्ण अन्तर्राष्ट्रिय समुदायको संयुक्त प्रयासको आवश्यकतामा जोड दिन्छ ।' विज्ञप्तिमा थप भनिएको छ- 'आशा छ, भारत र पाकिस्तानबीचका विद्यमान मतभेदहरू शान्तिपूर्ण माध्यमबाट समाधान गर्न सकिन्छ ।'

रुस दशकौंदेखि भारतको सबैभन्दा नजिकको सहयोगी रहँदै आएको छ, तर रुसले पाकिस्तानसँग पनि राम्रो सम्बन्ध कायम राखेको छ ।

यसैबीच, बेलायती विदेशमन्त्री डेभिड लामीले भारत-पाकिस्तान तनावलाई गम्भीर बताएका छन् । उनले भने- 'बेलायती सरकारले भारत र पाकिस्तान दुवैलाई संयम अपनाउन र सँगै बसेर कूटनीतिक वार्ता मार्फत समस्या समाधान गर्न अपील गर्दछ ।'

त्यस्तै फ्रान्सेली विदेशमन्त्री जीन-नोएल ब्यारोटले भारत र पाकिस्तान दुवैलाई संयम अपनाउन आग्रह गरेका छन् । फ्रान्सेली समाचार च्यानललाई दिएको अन्तर्वार्तामा ब्यारोटले भने- 'हामी आतंकवादको प्रकोपबाट आफूलाई बचाउने भारतको चाहना बुझ्छौं, तर हामीले दुवै देशलाई तनाव बढाउनबाट बच्न र नागरिकहरूको सुरक्षा गर्न संयम अपनाउन आग्रह गरेका छौं ।'