कश्मीरमा अज्ञात विमान दुर्घटनाग्रस्त, स्कुल भवनमा खस्यो

काठमाडौँ - भारत प्रशासित कश्मीरमा अज्ञात विमान दुर्घटनाग्रस्त भएको पाइएको छ ।  एक प्रत्यक्षदर्शी र स्थानीय सरकारी अधिकारीका अनुसार भारत प्रशासित कश्मीरमा अज्ञात विमान दुर्घटनाग्रस्त भएको छ ।

भारत प्रशासित कश्मीरको मुख्य शहर श्रीनगरबाट १९ किलोमिटर दक्षिणपूर्वमा अवस्थित वुयान गाउँमा विमान दुर्घटनाग्रस्त भएको थियो । श्रीनगरको अग्नि सेवा मुख्यालयका एक ड्युटी अधिकारीका अनुसार वुयानको एक स्कूल भवनमा लडाकु विमान दुर्घटनाग्रस्त भएको थियो ।

एएफपी समाचार एजेन्सीले प्रकाशित तस्बिरहरूमा वुयानमा रातो इँटाको भवनको छेउमा रहेको खेतमा विमानको भग्नावशेष देखिएको उल्लेख गरेको छ । भग्नावशेषको तस्बिरबाट विमान कसको हो भन्ने कुरा तुरुन्तै स्पष्ट भएको छैन ।

श्रीनगरका स्थानीयहरूले बुधबार बिहान भारतले पाकिस्तान विरुद्ध हवाई आक्रमण गरिरहेको बताएको समयमा ठूलो विस्फोट सुनेका थिए ।

गएराती भारतले पाकिस्तानविरुद्ध हवाई आक्रमण गरेपछि पाकिस्तानले आफ्ना ८ नागरिकको मृत्यु भएको र ३५ जना घाइते भएको बताएको छ । त्यस्तै पाकिस्तानको गोलीवारीमा ३ भारतीय नागरिकको मृत्यु भएको बताइएको छ ।