एनआरएनए महाधिवेशनले छान्यो नयाँ कार्यसमिति, अध्यक्षसहित कुन–कुन जिम्मेवारीमा को–को?

काठमाडौं– काठमाडौंको हायात होटलमा आइतबार सम्पन्न गैरआवासीय नेपाली संघ (एनआरएनए)को एकता महाधिवेशनले नयाँ कार्य समिति सर्वसम्मत निर्वाचित गरेको छ।

महेशकुमार श्रेष्ठको नेतृत्वमा सर्वसम्मत रूपमा कार्यसमिति चयन गर्दै अधिवेशन सम्पन्न भएको हो। 

एनआरएनए उच्चस्तरीय समितिले आयोजना गरेको एकता महाधिवेशनमा अध्यक्षसहित सबै पदमा सर्वसम्मत कार्यसमिति चयन भएको प्रमुख निर्वाचन आयुक्त वरिष्ठ अधिवक्ता गोपालकृष्ण घिमिरेले जानकारी दिए। उनले निर्वाचनमा सघाउने सवैलाई धन्यवाद पनि दिए। 

निर्वाचन समितिले महाधिवेशन स्थलमा आइतबार नै एक समारोह आयोजना गरी शपथग्रहण तथा प्रमाणपत्र वितरण गरिने जनाएको छ।

अध्यक्षमा श्रेष्ठसँगै ६ जना उपाध्यक्षमा क्रमशः सुनिल कुमार साह, बुद्धि सागर सुवेदी, खगेन्द्र न्यौपाने, लोकप्रसाद दाहाल, मनोज कुमार श्रेष्ठ (गोर्खाली), विश्वासदीप लिम्बू (तिगेला), जुनु गुरुङ सर्वसम्मत निर्वाचित भए। 

यसैगरी बाबुराम लामा महासचिवमा निर्वाचित हुँदा तीन खुला सचिवमा चिन्तामणि सापकोटा, टंकप्रसाद गैरे, तिलकप्रसाद गैरे सर्वसम्मत भएका छन्।  
कोषाध्यक्षको जिम्मेवारीमा ठाकुरप्रसाद ढुंगाना सर्वसम्मत भए। यसैगरी सचिव (महिला) देवकी खत्री गुरुङ, सहकोषाध्यक्ष कृष्णप्रसाद पोखरेल, महिला संयोजक रश्मी थापा, युवा संयोजक भीमसेन थापा, एसिया प्रशान्त क्षेत्रीय संयोजक डा. बलराम श्रेष्ठ, युरोप क्षेत्रीय संयोजक  प्रेमबहादुर गुरुङ, मध्यपूर्व क्षेत्रीय संयोजक रमेश श्रेष्ठ छानिएका छन्। 

यस्तै, उत्तर दक्षिण अमेरिका क्षेत्रीय संयोजक डिलुराम पराजुली, ओसेनिया क्षेत्रीय संयोजक– इर्सद अहमद, क्षेत्रीय उप संयोजकहरूमा एसिया प्रशान्त क्षेत्रमा माधव पोखरेल र मीमबहादुर पुर्जा, मध्यपूर्व क्षेत्रमा सुनिल कुमार घिमिरे र श्रीकृष्ण भट्टराई, उत्तर दक्षिण अमेरिका क्षेत्रमा विश्वराज बास्तोला र नरबहादुर टण्डन क्षेत्री छानिएका छन्। 

ओसियाना क्षेत्रमा राम प्रसाद कँडेल र प्रताप राना चयन भएका हुन्।