पाकिस्तानी महिलासँग बिहे गर्ने भारतीय प्रहरी जवान बर्खास्त, बिहे पनि अचम्मको

काठमाडौं– भारत र पाकिस्तानको तनावको प्रभाव एक दम्पत्तीमा देखिएको छ। युद्धको चरणमा रहेका भारत र पाकिस्तानको विवादको घानमा भारतीय सुरक्षाकर्मीको जीवन पिसिएको विवरण प्राप्त भएको हो।

पाकिस्तानी महिलासँग विवाह गरेपछि भारतको केन्द्रीय रिजर्भ पुलिस बल (सीआरपीएफ) ले जवान मुनिर अहमदलाई जागिरबाट बर्खास्त गरेको छ।

सीआरपीएफको ४१औँ बटालियनका सिपाही मुनिर अहमदले पाकिस्तानको सियालकोट निवासी मीनल खानसँग विवाह गरेको आरोप छ।

उनले मिनलको भिसा सकिएपछि पनि उनलाई अवैध रूपमा भारतमा राखेको दाबी छ।

सीआरपीएफले मुनिर अहमदलाई सेवा आचरण र राष्ट्रिय सुरक्षाको लागि खतरा मानिएको जनायो। उनले भिसा नियम उल्लंघन गरेर मिनललाई भारतमा आश्रय दिएको आरोप सीआरपीएफको छ।

मिनल मार्च २०२५ मा छोटो अवधिको भिसामा भारत आएकी थिइन्। उनले दीर्घकालीन भिसाका लागि आवेदन दिएकी छन्, जुन गृह मन्त्रालयमा विचाराधीन छ।

अप्रिल २२ मा पहलगाम आतंकवादी हमलापछि भारत सरकारले सबै पाकिस्तानी नागरिकको भिसा निलम्बन गरेको छ। पाकिस्तानी महिला मिनल खानलाई पनि देश छोड्न सूचना दिइएको थियो। 

सीआरपीएफ जवानले आफ्नी पत्नीलाई देशनिकालाबाट रोक्न जम्मुको भालवाल अदालतमा अपिल दायर गरेका थिए। जसअनुसार मिनलले मे २०२४ मा मुनिर खानसँग अनलाइन विवाह गरेकी हुन्।

मुनिर अहमदको परिवार जम्मु–कश्मीरको भलवालको राब्ता तहसिल नजिकैको हन्डवाल गाउँमा बस्छ। 

अदालतको आदेशपछि मिनललाई देश निकाला गरिएको थिएन, तर यो विषय मिडियामा आएपछि सीआरपीएफले मुनिरलाई जागिरबाट हटाएको हो।

मिनललाई अप्रिल ३० मा पाकिस्तान निर्वासनको लागि लगिँदै थियो। त्यतिबेला मीनलले ‘हामी सबै आतंकवादी हमलाको निन्दा गर्छौं, तर निर्दोष मानिसहरूलाई सजाय दिनु कहाँको न्याय हो?’ भनेकी थिइन्।

‘मैले समयमै भिसाको म्याद बढाउन आवेदन दिएको थिएँ। हामीलाई भनिएको थियो– स्वीकृति दिइनेछ, तर अब हामी पति–पत्नी अलग गरिँदै छ। धेरै बालबालिका आफ्ना आमाबाबुबाट अलग भइरहेका छन्। यो अमानवीय छ’, मिलनले भनिन्।

मिनलले प्रधानमन्त्री नरेन्द्र मोदीलाई न्यायका लागि अपिल पनि गरेकी थिइन् र आतंकवादका नाममा निर्दोष मानिसहरूलाई सजाय दिनु ठिक नभएको बताएकी थिइन्।