भारतले आगामी २४-३६ घण्टाभित्र सैन्य कारबाही गर्नसक्ने पाकिस्तानको दाबि

काठमाडौँ - भारतले आगामी २४-३६ घण्टा भित्र आफू विरुद्ध सैन्य कारबाही गर्न सक्ने पाकिस्तानले दाबि गरेको छ । पाकिस्तानका सूचना तथा प्रसारण मन्त्री अताउल्लाह तरारले यसबारे पाकिस्तानलाई गुप्तचर जानकारी प्राप्त भएको बताएका छन् ।

अताउल्लाह तरारले सामाजिक सञ्जालमा एक भिडियो पोष्ट गर्दै यो जानकारी दिएका हुन् ।

उनले भनेका छन्- 'पाकिस्तानसँग विश्वसनीय गुप्तचर जानकारी छ, भारतले पहलगाम घटनामा संलग्नताको आधारहीन र बनावटी आरोपको बहानामा आगामी २४-३६ घण्टा भित्र पाकिस्तानविरुद्ध सैन्य कारबाही गर्ने योजना बनाएको छ ।'

उनले थप भने, 'पाकिस्तान आफैं आतंकवादको शिकार भएको छ र यस संकटको पीडालाई साँच्चै बुझ्दछ । हामीले सधैं विश्वमा यसका सबै रूप र अभिव्यक्तिहरूको आलोचना गरेका छौं ।'

उनले पाकिस्तानले भारतले गरेको कुनै पनि सैन्य कारबाहीको निश्चित र निर्णायक जवाफ दिने समेत बताएका छन् । यसअघि पाकिस्तानका रक्षामन्त्री ख्वाजा आसिफले पनि एक अन्तर्वार्तामा भारतले चाँडै आक्रमण गर्ने बताएका थिए ।

अप्रिल २२ मा जम्मू कश्मीरको पहलगाममा आतंकवादी हमला भएको थियो, जसमा एक नेपाली सहित २६ जनाको मृत्यु भएको थियो । त्यसयता भारत र पाकिस्तानबीच तनाव बढेको छ ।