कमिज सुरूवालमा क्रिकेट : नेपालमा क्रिकेटको ९० वर्षे इतिहास

काठमाडौं– करिब ९० वर्ष पहिले नेपालमा क्रिकेटको जग बसालिएको तथ्यहरुले नेपालको खेलकुद इतिहासलाई अझ रोचक बनाएको छ।

वि.सं. १९९० को दशकमा काठमाडौंको टुँडिखेलमा क्रिकेट खेल खेलिरहेका खेलाडीहरूको एउटा पुरानो तस्वीरमा देखिएको विवरणले नेपालमा क्रिकेटको सुरुवातबारे नयाँ पाटो उजागर गरेको छ।

तस्वीरमा देखिएअनुसार, ती समयमा क्रिकेट खेल्ने खेलाडीहरूले परम्परागत नेपाली पोशाक, दाैरा/कमिज सुरूवाल, लगाएका थिए। खेलमैदानमा रहेका फिल्डिङ टोलीका १० जना खेलाडी र ब्याटिङ गर्ने कम्तीमा ६ खेलाडीलाई हेर्दा, क्रिकेट त्यतिबेलै नेपाली समाजमा लोकप्रिय हुँदै गएको संकेत पाइन्छ।

नेपालमा क्रिकेटको प्रवेश र विस्तारको इतिहासलाई नियाल्दा, यसको शुरुवात ब्रिटिश शासनसँगको सम्बन्धका कारण भएको देखिन्छ। जंगबहादुर राणाले बेलायतसँगको सम्बन्ध स्थापना गरेपछि, राणा परिवारका सदस्यहरू उच्च शिक्षाको लागि बेलायत जान थाले। सन् १९२० को दशकमा उच्च शिक्षा लिएर फर्केका राणा परिवारका सदस्यहरूले नेपालमा क्रिकेट खेल्न थालेका थिए।

यसै क्रममा, नेपालमा क्रिकेटको औपचारिक विकास र व्यवस्थापनका लागि वि.सं. २००३ मा नेपाल क्रिकेट संघ (CAN) को स्थापना गरिएको थियो। त्यसयता, क्रिकेटले नेपालमा उल्लेखनीय प्रगति गरेको छ र आज नेपाल अन्तर्राष्ट्रिय स्तरमा प्रतिस्पर्धा गर्ने क्रिकेट राष्ट्रको रूपमा स्थापित भइसकेको छ।

नेपाल क्रिकेटको यो ९० वर्षे यात्राले ऐतिहासिक महत्व बोकेको छ। परम्परागत नेपाली पोशाकमै क्रिकेट खेलिएको तस्बिरले देखाएझैं, यो खेल नेपालमा जरो गाड्दै अघि बढेको छ। हाल नेपालका खेलाडीहरूले अन्तर्राष्ट्रिय क्रिकेटमा नेपाललाई सम्मान दिलाइरहेका छन्, जुन नेपाली क्रिकेटको ऐतिहासिक यात्रा सफलताको प्रतीक बनेको छ।