प्रहरी सेवाका तीन सेलिब्रिटीः ३० बर्षसम्म हाँक, त्यसपछि राजनीतिको रापताप

काठमाडौं– नेपाल प्रहरीमा लामो समयसम्म विभिन्न नेतृत्वसहित सेवा निवृत्त भएका तीन प्रहरी अधिकारी अहिले राजनीतिको रापतापमा छन्।

संगठन प्रमुखको जिम्मेवारी पाउने बेला राजनीतिक दलकै कोपभाजनमा परेका नवराज सिलवालले एमालेबाट अहिले ललितपुरमा सक्रियता देखाएका छन्।

अघिल्लो प्रतिनिधि सभाको निर्वाचनमा ललितपुर–१ बाट निर्वाचित भएका उनले सरकारको मन्त्रीको जिम्मेवारी नपाए पनि सदनमा जनताका आवाजलाई बलियोसँग राख्ने मौका पाए।

शालिन स्वभावका उनी पछिल्लो निर्वाचनमा पराजित भए पनि एमालेको सांगठनिक काममा सक्रिय छन्। नेपाल प्रहरीको नायव महानिरिक्षक (डीआईजी)बाट राजीनामा दिएर उनी एमाले राजनीतिमा सक्रिय भए।

संगठन प्रमुख हुने बेला तत्कालिन माओवादी–कांग्रेस सरकारले उनलाई महानिरिक्षक (आईजी) पदमा नियुक्त गरेन। तर, जनताले उनलाई प्रतिनिधिका रुपमा सोही सालमा अनुमोदन गरिदियो।

प्रहरीको केन्द्रीय अनुसन्धान ब्युरो (सीआईबी) प्रमुख हुँदा उनले विभिन्न अपराधमा गरेको कामको उल्लेख्य प्रशंशा भएको थियो। नक्कली डाक्टरदेखि इन्जिनियरसम्मको अनुसन्धानमा अब्बल नेतृत्व गरेका सिलवालले आफ्नो उत्तरार्ध राजनीतिक सक्रियतामा नै समर्पण गरेका छन्।

प्रहरी संगठनको आईजी भएका सर्वेन्द्र खनाल अर्का सेलिब्रिटी हुन्। नेपालमा रहेको गुन्डागर्दीको जरो नै उखेल्नका लागि उनको सक्रियता लोभलाग्दो थियो।

खनालले प्रहरी संगठनलाई जसरी व्यवस्थित बनाए त्यसरी नै राजनीतिलाई पनि बलियो बनाउन सक्ने लक्ष्य राखेका छन्। उनको यो लक्ष्य निर्वाचनमा जित निकालेको भए लयसहित गतिमा हुने थियो तर उपनिर्वाचन समेतमा सहभागी हुने मौका पाउँदा पनि पराजित हुँदा तत्काल संगठनको काममा मात्र केन्द्रित छन्।

‘निर्वाचनमा हारजित सामान्य हो। तर, राजनीतिको गति कुनै पराजयले रोक्न सक्तैन, यसमा काम गर्न सक्ने विभिन्न मौका छन्। मौकालाई उपयोग गर्न सकिन्छ, त्यसमा तल्लिन छु’, खनाल भन्छन्।

काठमाडौं–६ र तनहुँ–३ मा निर्वाचन लड्ने मौका पाए पनि गठबन्धन र नयाँ दलको उदयको हावाले उनलाई जित निकाल्न दिएन। तर, कडा टक्करका साथ मैदानमा रहे। अहिले एमाले राजनीतिमा नै उनको सक्रियता छ।

प्रहरीको डीआईजी पदबाट राजीनामा दिएर आफ्नै दल खोलेका रमेश खरेल पनि सेलिब्रिटी थिए। उनको लोकप्रियताका कारण गत निर्वाचनमा आमा चुनाव चिन्हमा काठमाडौं–१ मा सम्मानजनक मत ल्याए पनि पराजित भए। फेरी बारा–२ मा उपनिर्वाचनमा राष्ट्रिय स्वतन्त्र पार्टी (रास्वपा) रोजे पनि सफल हुन सकेनन्। तैपनि उनको सक्रियता नयाँ दलबाट छ। उनी पार्टीको जिम्मेवारीमा रहेर अहिले काम गरिरहेका छन्।

प्रहरीमा हुँदा उनले पनि गुन्डागर्दीविरुद्ध अभियान चलाए भने राजनीतिक दबाबलाई नटेरेका कारण चर्चामा थिए। आईजी हुन नपाउँदा उनले राजीनामा दिएका थिए।