सुदुरपश्चिमका मुख्यमन्त्रीलाई विश्वासको मत दिन प्रचण्डको निर्देशन
काठमाडौं– माओवादी केन्द्रका अध्यक्ष पुष्पकमल दाहाल ‘प्रचण्ड’ले सुदूरपश्चिमका मुख्यमन्त्रीलाई विश्वासको मत दिन आफ्ना पार्टीका सांददलाई निर्देशन दिएका छन् ।
प्रधानमन्त्रीसमेत रहेका प्रचण्डले प्रदेशस्थित माओवादी केन्द्रको संसदीय दलका नेतालाई मुख्यमन्त्रीलाई विश्वासको मत दिन निर्देशन दिएका हुन् ।
सदुरपश्चिम प्रदेशका मुख्यमन्त्री कमलबहादुर शाहले आज विश्वासको मत लिन लागेका छन् ।
एमालेका तत्कालिन मुख्यमन्त्री राजेन्द्र रावलले विश्वासको मत नपाउँदा सरकार छाड्नुपरेको थियो ।
अहिले कांग्रेससँग पावर शेयरिङको कुरा टुंगो लागिनसकेको भए पनि यथास्थितिमा सुदुरपश्चिमको मुख्यमन्त्रीलाई विश्वासको मत दिन प्रचण्डले संसदीय दलका नेता खगराज भट्टलाई निर्देशन दिएको जानकारी प्रचण्डका प्रेस विज्ञ मनहरि तिमल्सिनाले बताए ।
‘प्रदेशमा सरकार बन्ने संवैधानिक प्रक्रिया र व्यवस्थाअनुसार पनि हामीले विश्वासको मत दिनुपर्ने अवस्था देखिएको छ । केन्द्रमा सरकार पुनर्गठनको अभ्यासमा प्रदेशमा पनि एउटा समझदारी पुग्नुपर्ने हुन्छ । अहिले विश्वासको मत दिनुस्, सत्ता साझेदारीको विषयमा थप छलफल गर्दै जाउँला भनेर अध्यक्षले सुदूरपश्चिमस्थित माओवादी संसदीय दलका नेता खगराज भट्टलाई निर्देशन दिनुभएको छ’, तिमल्सिनाले बताए ।
५३ सदस्यीय सुदूरपश्चिम सरकारमा विश्वासको मतका लागि २७ सांसदको समर्थन आवश्यक पर्छ । सुदूरपश्चिममा कांग्रेसका १९, माओवादीका ११, एमालेका १०, नागरिक उन्मुक्तिका ७, एकीकृत समाजवादीका ४ तथा राप्रपा र स्वतन्त्र १/१ सांसद छन् । १९ सीट रहेको कांग्रेसलाई माओवादीबाट सभामुखबाहेक १० सांसदको समर्थन भए सहजै बहुमत पुग्नेछ ।