अन्तर्राष्ट्रिय बजारमा नेपाली चिया सर्वोत्कृष्ट

काठमाडौँ– अन्तर्राष्ट्रिय बजारमा गुणस्तरमा सर्वोत्कृष्ट हुँदै नेपाली चियाले स्वर्ण, रजत र सिल्भर अवार्ड जितेको छ ।

चीनको चीन चिया मार्केटिङ संघले आयोजना गरेको दोस्रो विश्व कालो चिया गुणस्तर परीक्षण मूल्यांकन प्रतिस्पर्धामा नेपाली १० उत्पादक संस्थाले अवार्ड जितेको बिहीबार राष्ट्रिय चिया तथा कफी विकास बोर्डले पत्रकार सम्मेलन गरी जानकारी दिएको हो ।

नेपालमा उत्पादित १६ वटा चियाको नमुना परीक्षणमा पठाएकामा १० प्रकारका चियाले विश्व गुणस्तरमा उच्च रहेको प्रमाणित भएको बोर्डले  जनाएको छ ।

बोर्डका कार्यकारी निर्देशक डा। विष्णुप्रसाद भट्टराईले नेपालको चियाको चिनियाँ बजार राम्रो रहेको बताए । उनले बोर्डले नेपालमा उत्पादित चियाको बजार व्यवस्थापनका लागि पहल गरिरहेको पनि बताए । 

चीनमा नेपाली चियाको अनलाइन विज्ञापन सुरु भइसकेको बताउँदै उनले अवार्ड विजेता भएसँगै नेपाली चिया अन्तर्राष्ट्रिय बजारमा अब्बल दर्जाको रहेको र आर्थिक उन्नतिका लागि महत्वपूर्ण मानिने उल्लेख गरे । 

उनले गत वर्षको तुलनामा नेपाली चियाको अन्तर्राष्ट्रिय बजारमा निर्यात ३६ प्रतिशतले बढेको जानकारी दिए । नेपाली चियाको निर्यात वृद्धिले नेपाली चियाको माग अन्तर्राष्ट्रिय बजारमा बढ्दै गएको उनको भनाइ छ । 

त्यस्तै, पर्ल गोल्डेन चियाका सञ्चालक रितुकान्त खनालले रासायनिक मल तथा विषादी प्रयोगबिना अग्र्यानिक चिया उत्पादन गर्नुको प्रतिफल गोल्डेन अवार्ड भएको बताए ।

आफूहरूले किसानको आयमा वृद्धि गरी मुलुकमा विदेशी मुद्रा आर्जनका लागि महत्वपूर्ण भूमिका खेल्न मद्दत गर्ने गरी चिया उत्पादनमा लागेको उनको भनाइ छ । उनले नेपाली चिया उत्पादनलाई सरकारले उद्योगका रूपमा विकास गर्ने गरी नीति–नियम बनाउन आवश्यक रहेको पनि बताए । 

विश्वका प्रमुख चिया उत्पादक राष्ट्रहरू चीन, भारत, केन्या, श्रीलंका जस्ता देशसँग नेपाली चियाको प्रतिस्पर्धा गराइएको थियो ।

आगामी दिनमा अन्तर्राष्ट्रिय बजारमा नेपाली चियाको निर्यात व्यापार बढाउन सहज हुने विश्वास लिइएको छ ।

तीनजुरे चिया कृषक सहकारी संस्थाद्वारा उत्पादित पर्ल गोल्डेन चियाले गोल्डेन अवार्ड पाएको छ भने फार्मर चिया प्रशोधन उद्योगले उत्पादन गरेको एफटी हिमालयन गोल्डेन, सांग्रिला गोल्डेन, जिटिई–गोल्डेन चिया, सिल्भर विंग्स, गोल्डेन टिप्स चियाले गोल्डेन मेडल अवार्ड जिते ।

२०३९ सालमा तत्कालीन राजा वीरेन्द्रले नेपालका झापा, इलाम, पाँचथर, धनकुटा र तेह्रथुम जिल्लालाई चिया क्षेत्र घोषणा गरेका थिए । 

आर्थिक वर्ष २०७७÷७८ को तथ्यांकअनुसार नेपालमा १६ हजार ९१७ हेक्टर क्षेत्रमा खेती भएर त्यसबाट २३ हजार ७४५ मेट्रिक टन उत्पादन भइरहेको छ । नेपालमा १७ हजार चिया कृषक र ६० हजारभन्दा बढी श्रमिक आबद्ध रहेको बोर्डले जनाएको छ ।

आर्थिक वर्ष २०७७÷७८ मा ३ खर्ब ७९ करोड ७१ लाख रुपैयाँ बराबरको ११ हजार ९२० मेट्रिक टन चिया निर्यात भएको छ ।