उत्कृष्ट कृषक पुरस्कृत

पाल्पा– कृषि तथा पशुपन्छी पालनमा उत्कृष्ट कार्य गर्ने कृषकलाई पुरस्कृत गरिएको छ ।

रामपुर नगरपालिका र निस्दी गाउँपालिका क्षेत्रका ३६ कृषकलाई व्यवसायमा प्रोत्साहन गर्दै पुरस्कृत गरिएको हो ।

रामपुरमा सञ्चालित कृषि मेला प्रदर्शनी, तेस्रो रामपुर महोत्सव तथा व्यापार मेलाका अवसरमा गरिएको प्रदर्शनीमा विभिन्न विधामा उत्कृष्ट कृषक पुरस्कृत भएका छन् ।

तरकारी बाली, फलफूल बाली, मसला बाली, जरे बाली, पुष्प बाली, खाद्यान्न बाली, व्यावसायिक च्याउ खेती, बोका पालन, बाख्राको खोर व्यवस्थापन, बंगुर पालन, गाईभैँसी पालनमा विधा तोकेर उत्कृष्ट कृषकलाई पुरस्कृत तथा सम्मान गरिएको कृषि तथा पशु प्रदर्शनी मेलाका संयोजक सूर्यप्रसाद रेग्मीले बताए ।

तरकारी बालीतर्फ उत्कृष्ट गोलभेँडा खेतीमा दुर्गाबहादुर मश्रांगी, लौका खेतीमा धनमाया पोखरेल, ब्रोकाउली खेतीमा भगवती देवकोटा र गीता अधिकारी, फलफूलतर्फ उत्कृष्ट केरा खेती (जिनाइन जात) सोमबहादुर सेन, स्थानीय केरा खेती हेमबहादुर राना, स्थानीय मेवा थुमकला पाण्डेय, कागती खेती चित्रादेवी देवकोटा उत्कृष्ट भएका छन् । 

मसला बालीतर्फ अदुवा खेतीमा राममाया लामिछाने, बेसार खेतीमा शिवप्रसाद बस्याल, माया पाठक, लसुन खेतीमा घनश्याम देवकोटा, खाद्यान्नतर्फ मकै खेतीमा चित्रादेवी देवकोटा, फापर खेतीमा जगन्नाथ गैरे र बालिकादेवी रेग्मी, च्याउ खेतीमा सेरबहादुर सोती, पुष्प खेतीमा सुकमाया सारु, शान्ति चितौरे, लालबहादुर थापा पुरस्कृत भए ।

जरे बालीतर्फ मुला खेतीमा भगवती बस्याल, तरुल खेतीमा घनश्याम बस्याल, गाँजर खेतीमा बन्दना पोखरेल, पिँडालु खेतीमा जिता सार्की उत्कृष्ट भई पुरस्कार प्राप्त गरे । 

पशु पालनतर्फ गाईभैँसी पालनमा प्रथम भट्टराई उन्नत गाई फार्म, द्वितीय होलस्टिन गाई तथा भैँसी फार्म, तृतीय चूडामणि कृषि तथा पशुपन्छी कृषि फार्म भएको छ । 

बंगुरपालनमा कृषि तथा पशुपन्छी फार्म उत्कृष्ट हुन सफल भएको कृषि तथा पशुमेला प्रदर्शनी समितिले जनाएको छ । बोका पालनमा प्रथम लीला श्रेष्ठ, द्वितीय नारायण भण्डारी, तृतीय पार्वती मल्ल, सान्त्वना दाजुभाइ सप्लायर्स, बाख्राको खोर व्यवस्थापनमा प्रथम जी एग्रोगट फार्म, द्वितीय निर्मल पशुपन्छी फार्म, द्वितीय कृष्णगण्डकी बाख्रा पालन फार्म, सान्त्वना स्थान युवा समृद्धि बाख्रा फार्मले पुरस्कार हात पारेका छन् । 

कृषि मेला प्रदर्शनीका लागि कृषि ज्ञान केन्द्र पाल्पाले आर्थिक सहयोग गरेको छ । ज्ञान केन्द्रका प्रमुख कामना अधिकारीले कृषकलाई प्रोत्साहन गर्दै व्यावसायिक उत्पादनमा जोड दिने उद्देश्यले प्रदर्शनीमा सहयोग गरिएको बताए ।