महोत्तरी ११ फागुनदेखि हात्तीपाइले रोगको खुवाइने

महोत्तरी –महोत्तरीमा हात्तीपाइलेको प्रकोप बढ्दै गएपछि प्रतिरोधात्मक औषधी खुवाइने भएको छ ।

११ फागुनदेखि २४ फागुनसम्म स्वास्थ्यकर्मीहरू घर–घरमा नै पुगेर ३ वर्ष देखि माथिका सबै जनालाई उचाइ र वजन अनुसार औषधि खुवाइने जिल्ला स्वास्थ्य कार्यालय महोत्तरीले जनाएको छ ।

उचेरिया ब्याङक्रफ्टी नामक परजीवी र क्युलेक्स जातको लामखुट्टेको टोकाइले सङ्क्रमण हुने यो रोगको कारण महोत्तरी उच्च जोखिममा छ । गत वर्षको तथ्याङ्कअनुसार १ हजार ५०० जनामा सङ्क्रमण देखा परेको थियो ।

स्वास्थ्यकर्मीहरूका अनुसार हात्तीपाइले रोगको उपचार समयमा गर्न सकिएन भने यसले भयावह रूप लिन सक्छ । हात्तीपाइले रोगको धेरैजसो सङ्क्रमण लक्षण बिनाको हुन्छ भने पछि गएर अङ्ग सुनिने पनि गर्दछ ।

कतिपयमा अण्डकोष, केहीमा खुट्टा, केहीमा हात, केहीमा स्तन र शरीरका अन्य अङ्गहरू सुनिने स्वास्थ्यकर्मीहरूको भनाइ छ ।