कमल थापालाई समर्थन गरेपछि एमाले मकवानपुरमा चुलियो विवाद

मकवानपुर–राष्ट्रिय प्रजातन्त्र पार्टी नेपालका अध्यक्ष कमल थापालाई समर्थन गरेको भन्दै एमाले मकवानपुरमा विवाद चुलिएको छ । रुष्ट कार्यकर्ताले जिल्लास्थित पार्टी कार्यालयमा तालाबन्दी गरेका छन् । थापालाई समर्थन गरेको विरोधमा पार्टीको जिल्लास्थित नेतृत्व मौन बसेको भन्दै रुष्ट भएका कार्यकर्ताले हेटौंडा–५ स्थित सानोपोखरामा रहेको कार्यालयमा तालाबन्दी गरेका हुन् । उनीहरूले थापालाई सहयोग गरेर केन्द्रियता हावी भएको र पार्टी कार्यकर्तामाथि अन्याय भएको आरोप नेतृत्वमाथि लगाएका छन् । थापाले मकवानपुर– १ बाट एमालेको चुनाव चिह्नबाट उम्मेदवार उठ्दै छन् । थापा यसअघिको निर्वाचनमा यसै क्षेत्रबाट एमालेका कृष्ण दाहालसँग पराजित भएका थिए । मकवानपुरे राजनीतिमा थापा र एमालेबीच लामो समयदेखि प्रतिस्पर्धा हुँदै आएको छ । जसका कारणले गर्दा एमालेका जिल्लास्थित पदाधिकारी तथा कार्यकर्ता थापालाई खुलेर सहयोग गर्ने पक्षमा देखिएका छैनन् ।