शो बढाउँदै प्रकाश

काठमाडौं– शुक्रबारबाट प्रदर्शनमा आएको फिल्म ‘प्रकाश’ लाई हलवालाले सोचेजस्तो शो नदेखिएपछि यसका अभिनेता प्रदीप खड्का, निर्माता महेन्द्र अधिकारी निकै रिसाए । बलिउडबाट ‘लाइगर’ रिलिज हुनेभएपछि हलवालाले ‘लाइगर’ लाई प्राथमिकतामा राखेर ‘प्रकाश’ र ‘राधा’ लाई कम शो दिए । ‘प्रकाश’ को टिमले त शुक्रबार बिहान पत्रकार सम्मेलन गरेरै आक्रोश पोख्यो । अभिनेता प्रदीपले हलले राम्रो शो नदिए आफूहरु प्रोजेक्टरमार्फत नै भए पनि सार्वजनिक रुपमा फिल्म देखाउने चेतावनी नै दिए । फिल्म ‘प्रकाश’ लाई क्युएफक्स चेनले सर्वाधिक १६ वटामात्र शो दिएको थियो । जबकी ‘लाइगर’ लाई २४ सो दिएको छ । अन्य हलहरुले पनि नेपाली फिल्मलाई भन्दा बलिउड फिल्मलाई विशेष महत्व दिएका छन् । ‘प्रकाश’ का वितरक रोहित कट्टेलका अनुसार क्युएफक्स चेनले फिल्मलाई शनिबार २३ शो दिएको छ । ‘अन्य हलहरुले पनि प्रकाशको शो बढाउनेतर्फ चासो दिएका छन् । हामीले हलवालालाई शो बढाउनका लागि आग्रह गरिरहेका छौं’, उनले भने । ‘प्रकाश’ निर्देशक दिनेश राउत शुक्रबारको तुलनामा शनिबार शोको संख्या बढेको स्वीकार्दै बाँकी दिनमा पनि शो बढ्नेमा ढुक्क देखिए । ‘यो समस्या प्रकाशमा मात्र होइन, धेरै अघिका फिल्मले पनि यस्तै समस्या भोग्दै आएका छन् । हामीले आवाज उठाएका छौं’, दिनेशले भने, ‘फिल्म हेर्दै नहेरी अनुमानका भरमा हलवालाले शो कम दिँदा हामी मारमा परेका छौं । जति हलमा फिल्म रिलिज भएका छन्, सबैतिरबाट राम्रो प्रशंसा पाइरहेका छौं । फिल्मले पिकअप लिनेमा ढुक्क छु ।’ फिल्ममा प्रदीपसँगै दीया मास्के, रेनु योगी, प्रकाश घिमिरे, राजन खतिवडालगायतको अभिनय छ । फिल्मका निर्माता महेन्द्र अधिकारी हुन् । ‘प्रकाश’ अघिका घटनाक्रमलाई हेर्ने हो भने नेपाली फिल्ममा दर्शकको संख्या बढ्दै गएपछि मात्र हलवालाले शो थप्दै गएका उदाहरण प्रशस्त छन् । नेपाली फिल्मलाई हलवालाले प्राथमिकता दिनुपर्ने आवाज पटक पटक उठ्दै आए पनि यसको सुनुवाई हुन सकेको छैन ।