घर बनाउने ठेकेदारसँग प्रेम र अनैतिक सम्बन्धपछि पति हत्या, यसरी बनाइएको थियो योजना

काठमाडौं– परिवारमा तेस्रो मानिसको प्रवेशसँगै हुने ‘हबस’को खेलले हत्याको तहसम्म पनि पुराउने घटना धेरै छन्। 

तर यस्तो हत्या जुन दुर्घटना जस्तो बनाउने प्रयासलाई फत्तेसम्म गराइन्छ। पटक–पटक हत्याका प्रयास असफल हुँदा पनि नयाँ तरिका सोचेर शंका नहुने निधोमा पुग्नु कति आपराधिक मानसिकता होला। 

यस्तै उदाहरण हो, दुई बर्षअघि पत्ता लागेको भारतको उत्तर प्रदेश कानपुरको यो प्रकरण।

घर बनाउने ठेकेदारसँग प्रेम र अनैतिक सम्बन्ध कायम गर्ने, भिडिओ कलमा नग्नताको खेल समेत भएको थियो। दुई बच्चाकी आमा हुँदा पनि यो तहको खेलपछि हत्याको योजना कसरी रचियो?

उत्तर प्रदेशको कानपुरमा घटेको एउटा घटनाले समाजलाई नै झस्काएको थियो। जहाँ प्रेम, विश्वासघात र लोभको घेराभित्र एक शिक्षकको निर्मम हत्या गरिएको थियो। 

मृतक ४१ वर्षीय राजेश गौतम, जो प्राथमिक विद्यालयमा सहायक अध्यापकको पदमा कार्यरत थिए, आफ्नै पत्नीको षडयन्त्रको शिकार बने।

कानपुर चकेरीको कोयलानगरमा बस्ने राजेश गौतम बिहानको वाकका लागि घरबाट निस्किएका थिए। तर, केही बेरमै एक कारले ठक्कर दिँदा उनको घटनास्थलमै मृत्यु भयो। 

सुरुवाती अनुसन्धानमा प्रहरीले यसलाई साधारण सडक दुर्घटना ठानेको थियो। तर, मृतकका दाजुले यसमा शंका व्यक्त गर्दै उजुरी दिएपछि घटनाले फरक मोड लियो।

राजेशकी पत्नी उर्मिला उर्फ पिंकी, शिक्षित महिला थिइन्। उनले बीएडसम्म अध्ययन गरिसकेकी थिइन्। तर, विवाहपश्चात उनी घर बनाउने ठेकेदार मिस्त्री शैलेन्द्र सोनकरसँग नजिकिन थालिन्। यही नजिकताले पछि अवैध सम्बन्धको रूप लियो। जब राजेशले पत्नी र शैलेन्द्रबीचको सम्बन्धबारे थाहा पाए, उनले शैलेन्द्रलाई आफ्नो घर आउनै रोक लगाए। यतिबाट पति–पत्नीबीच विवाद बढ्न थाल्यो।

विवाद र सम्बन्ध बचाउने नाममा पिंकी र शैलेन्द्रले खतरनाक बाटो रोजे। दुबैबीच राजेशलाई हटाएर स्वतन्त्र जीवन बिताउने योजना बनेको थियो। प्रहरी अनुसन्धानअनुसार पिंकीले चार लाख रुपैयाँ खर्च गरेर हत्यारा भाडामा लिएकी थिइन्।

हत्या योजनाअनुसार, शैलेन्द्रले आफ्नो चेला भाई विकास र एक ड्राइभरलाई साढे दुई लाख रुपैयाँमा संलग्न गराए। रणनीति यसरी बनाइएको थियो कि राजेशको हत्या कार दुर्घटनाजस्तो देखियोस्। त्यसैले बिहान वाकमा निस्किएका राजेशलाई कारले किचेर हत्या गरियो।

घटनापछि प्रहरीले जब पिंकीको मोबाइलको कल डिटेल निकाल्यो, सबैभन्दा ठूलो प्रमाण हात लाग्यो। घटनाको दिन उनले बारम्बार शैलेन्द्रसँग सम्पर्क गरेकी थिइन्। सोधपुछका क्रममा शैलेन्द्रले सबै कुरा स्वीकारे। 

उनले बयानमा भने–
हत्या भएपछि म निकै तनावमा परें। तुरुन्तै पिंकीलाई फोन गरेँ। सबै कुरा बताएँ। उसले छोटकरीमा भनेकी थिईन्, एक्सिडेन्ट भयो? ठीक छ, जसरी भए पनि गर।

यसबाट स्पष्ट भयो कि राजेशको हत्या योजनाबद्ध ढंगले गरिएको थियो, जसमा राजेशकै पत्नी प्रत्यक्ष संलग्न थिइन्।

प्रहरीले पिंकी, उनको प्रेमी शैलेन्द्र र शैलेन्द्रको भाई विकासलाई पक्राउ गरी जेल चलान गरिसकेको छ। यसबाहेक, ड्राइभरलाई समेत पक्राउ गरिएको छ। हाल उनीहरूलाई हत्या र आपराधिक षडयन्त्रको मुद्दामा अदालतले कारबाही अगाडि बढाएको जनाइएको थियो।

यो घटना केवल एउटा परिवारको त्रासदी मात्र होइन, सामाजिक चेतावनी पनि हो। विवाह जस्तो पवित्र सम्बन्ध विश्वास र आपसी समझदारीमा टेकेको हुन्छ। तर, जब यसमा विश्वासघात, लोभ र अवैध सम्बन्ध प्रवेश गर्छन्, परिणाम अत्यन्तै डरलाग्दो हुन्छ।

शिक्षकजस्तो सम्मानित पेशामा कार्यरत व्यक्तिको हत्या पत्नी र प्रेमीले मिलेर गर्नु केवल अपराध मात्र होइन, नैतिक मूल्यको पतन पनि हो।
कानपुरको यो हत्या प्रकरणले समाजलाई धेरै प्रश्नहरू खडा गरेको छ।

के प्रेम वा सम्बन्धका नाममा हत्या गर्न सकिन्छ? के पैसाको लोभ यति ठूलो हुन्छ कि मान्छे जीवनलाई तुच्छ ठान्छ? र, विश्वासघातले कसरी एक परिवारलाई चकनाचुर पार्छ?

यी सबै प्रश्नहरूको जवाफ समाज र न्यायिक प्रक्रियाले खोज्दै जानेछ। तर, सत्य यही हो कि प्रेमी र पत्नीको योजनामा फसेर एक निर्दोष शिक्षकले आफ्नो जीवन गुमाउनु परेको थियो।

(इन्टरनेटमा उपलब्ध विभिन्न समाचार माध्यमको सहयोगमा तयार पारिएको हो। सम्पादक)