प्रहरीका आईजी बाबुले हवल्दारको जागिर खाइ दिएका थिए, वकिल छोरीले फिर्ता गराइन्

काठमाडौं– कहिलेकाहीँ विश्वास गर्न नसक्ने खबर पनि सतहमा आउने गरेका छन्। 

त्यस मध्यको एउटा खबर भारतको उत्तर प्रदेशबाट शनिबार नवभारत दैनिकको अनलाइन संस्करणले लेखेको छ। 

बरेलीमा घटेको एउटा अनौठो घटना अहिले चर्चामा छ। यहाँ जीआरपीका हवल्दार तौफिक अहमदलाई छेडछाडको आरोपमा तत्कालीन आईजी डा. राकेश सिंहले बर्खास्त गरेका थिए। तर अचम्मको कुरा के भने, त्यही आईजीको छोरी र वकिल पेशामा रहेकी अनुरा सिंहले तौफिककै पक्षमा केस लडिन् र उसलाई पुनः जागिर फिर्ता दिलाइन्।

यो घटना १३ जनवरी २०२३ मा सुरु भएको थियो। पिलीभीतकी एक छात्राले जीआरपी जंक्शन थानामा तौफिक अहमदविरुद्ध चल्ती ट्रेनमा छेडछाड गरेको उजुरी दिएकी थिइन्। 

यस मामलामा प्रहरीले पोक्सो ऐन समेत लगाएको थियो। उजुरीपछि तौफिकलाई पक्राउ गरी जेल पठाइयो र विभागीय छानबिनमा समेत दोषी ठहर गरियो।

छानबिनको आधारमा तत्कालीन आईजी डा. राकेश सिंहले तौफिकलाई बर्खास्त गर्ने आदेश दिए। तर तौफिकले यस निर्णयविरुद्ध इलाहाबाद उच्च अदालतमा मुद्दा हाले। यही बेला आईजी सिंहकी छोरी अनुरा सिंहले तौफिकको पक्षमा वकिलको हैसियतमा मुद्दा लडिन्।

अनुराले अदालतमा तर्क दिँदै विभागीय छानबिन र बर्खास्ती प्रक्रिया कानुनी दृष्टिले त्रुटिपूर्ण भएको दाबी गरिन्। उच्च अदालतले दुवै पक्षका कुरा सुनेर बर्खास्तीको आदेश र विभागीय छानबिनको प्रतिवेदनलाई अवैध ठहर ग¥यो। अदालतले तौफिकलाई पुनः प्रहरी सेवामा फिर्ता लिने आदेश दियो।

यसरी, जसले तौफिकलाई बर्खास्त गरेका थिए, उनका आफ्नै छोरीले वकिल बनेर उसलाई जागिर फिर्ता दिलाइन्। तर छेडछाडको आपराधिक मुद्दा भने अझै अदालतमा विचाराधीन छ र अन्तिम फैसला बाँकी छ। अदालतले अन्ततः तौफिक दोषी हो कि होइन भन्ने टुंगो लगाउनेछ।