११ करोड ठगी प्रकरणमा सेयर ब्रोकर जयन्त श्रीवास्तव पक्राउ

काठमाडौँ- ब्रोकर नम्बर २२ सिप्रवी सेक्युरिटिज प्रालिका महाप्रबन्धक जयन्त श्रीवास्तवलाई प्रहरीले नियन्त्रणमा लिएको छ। लगानीकर्ता दीपेन्द्र अग्रवालकी श्रीमती मिता मुरारका अग्रवालले दिएको उजुरीका आधारमा उनलाई नियन्त्रणमा लिएको हो।

मिता अग्रवालले सिप्रवी सेक्युरिटिजका अध्यक्ष रविराज भट्टराई, महाप्रबन्धक जयन्त श्रीवास्तव, प्रबन्ध निर्देशक सतिष कुमार श्रेष्ठ र सिनियर अधिकृत कविराज न्यौपानेविरुद्ध जिल्ला प्रहरी वृत्त सिंहदरबारमा ठगीको आरोप लगाउँदै उजुरी दिएकी थिइन्। उजुरीपछि प्रहरीले चारै जनालाई पक्राउ गर्न असार ९ गते पक्राउ पूर्जी जारी गरे पनि तत्कालीन समयमा उनीहरूलाई नियन्त्रणमा लिएको थिएन।

तर साउन २० गते महाप्रबन्धक श्रीवास्तव आफैँ प्रहरी कार्यालयमा उपस्थित भएपछि काठमाडौँ प्रहरी परिसरले उनलाई नियन्त्रणमा लिएको जनाएको छ। प्रहरीका अनुसार श्रीवास्तव अनुसन्धानका क्रममा आफैँ सम्पर्कमा आएको र उनलाई आवश्यक कारबाहीका लागि नियन्त्रणमा लिइएको हो।

११ करोड ५५ लाख रुपैयाँ ठगीसम्बन्धी उजुरीका आधारमा अनुसन्धान अघि बढाइएको प्रहरीले जनाएको छ। श्रीवास्तव अनुसन्धानकै क्रममा स्वयं उपस्थित भएका हुन्।