‘गुन्डा नाइके’ गुरुङ फेरि पक्राउः यसरी गुन्डाराज जमाउने प्रयास गरिरहेका थिए

काठमाडौं– ठमेलमा कुटपिट र झमेला मच्चाइरहने गुन्डा नाइके युवराज गुरुङलाई प्रहरीले पक्राउ गरेको छ।

ठमेलमै रहेको नगरकोट दोहोरी साँझबाट उनलाई पक्राउ गरिएको हो। बुधबार राती भैझगडा गरेपछि पक्राउ गरिएको प्रहरीले जनाएको छ।

गुरुङ पटक–पटक कुटपिट, झगडा जस्ता लफडा मच्चाउनेमा पर्छन्।

यसअघि डेढ बर्ष पहिला धरौटीमा रिहा भएपछि फेरि उनले कुटपिट मच्चाएका थिए।

जिल्ला अदालत काठमाडौंबाट १० हजार धरौटीमा रिहा भएपछि २०८० को मंसिरमा सानुभाइ भनिने उनीविरुद्ध जाहेरी परेको थियो।

ठमेलस्थित छायाँ सेन्टरको पार्किङ लटमा गुरुङसहितको समूहले एक पुरूषमाथि कुटपिट गरेपछि सानुभाइसहित ७ जनाविरुद्ध प्रहरी वृत्त दरबारमार्गमा ज्यान मार्ने उद्योगको कसुरमा किटानी जाहेरी परेको थियो।

कुटपिट भइरहेको सिसीटिभी फुटेज पनि सार्वजनिक भएको थियो। प्रहरी वृत्त दरबारमार्गमा सानुभाइसहित ६ जनाविरूद्ध पीडितले जाहेरी दिएका थिए।

कुट्ने र कुटिने समूहका व्यक्तिहरु दुवै प्लेब्वाई नामक डिस्कोबाट छाया सेन्टरसम्म पुगेका थिए। 

ठमेलको क्लब ओम्नियाका सञ्चालकलाई सोही बर्षको १५ असारमा कुटपिट गरेको आरोपमा पक्राउ परेका बेला प्रहरीले सानुभाइलाई हत्कडीसहित ठमेलमा घुमाएको थियो।

क्लब ओम्नियाका सञ्चालक गुरुङलाई कुटपिट गरेपछि पक्राउ परेका सानुभाइलाई जिल्ला अदालत काठमाडौंका न्यायाधीश प्रकाशप्रसाद पण्डितको इजलासले साउन १० गते १० हजार धरौटीमा छाड्ने आदेश दिएका थिए।

सानुभाई प्रहरी इन्काउन्टरमा मारिएका गुण्डा नाइके कुमार घैंटेका समूहका व्यक्ति हुन्। 

उनी घैंटेको मुख्य सहयोगी भएर काम गर्थे। घैंटेको इन्काउन्टर भएपछि असुरक्षित मान्दै बुलेटप्रुफ ज्याकेट लगाएर हिड्ने गरेका उनै सानोभाइलाई प्रहरीले २०७२ सालमा पक्राउ गरेको थियो। 

त्यतिबेला उनको साथबाट पेस्तोल र गोलीसमेत बरामद भएको थियो।

सानोभाइले २०६७ सालमा नुवाकोटका निर्माण व्यवसायी अनिल श्रेष्ठलाई हप्ता असुली नदिएको भन्दै गोली प्रहार गरेका थिए। नुवाकोटकै होटल व्यवसायी सुरेश डंगोललाई पनि उनले आक्रमण गरेका थिए।

तर, राजनीतिक दबाबकाबीच सानोभाइमाथि त्यतिबेला कुनै कारबाही भएन। उनी नेपाली कांग्रेस निकट मानिन्छन्। 

कांग्रेस महामन्त्री गगन थापासँग नजिकको सम्बन्ध बनाएका गुरुङले राजनीतिक आडमा गुण्डागर्दी गर्दै आएको आरोप लागेको थियो। उनले गगन थापालाई हेलिकोप्टरमा समेत घुमाउने गर्दथे।