एमाले पोलिटब्युरो बैठक : नेताहरु भन्छन्– पार्टी थप एकताबद्ध हुने आधार तय भयो

काठमाडौं- नेकपा (एमाले)का नेताहरुले पोलिटब्युरोको बैठकले पार्टीलाई थप एकताबद्ध बनाएर लैजाने संकल्प गरेको बताएका छन् ।

महासचिव शंकर पोखरेल, उपमहासचिव प्रदीप ज्ञवाली र स्थायी कमिटी सदस्य एवं पार्टीको बागमती प्रदेशका इन्चार्ज डा. राजन भट्टराईले बैठकपछि सामाजिक सञ्जालमा आफ्ना धारणा राख्दै यस्तो बताएका हुन् । महासचिव पोखरेलले ‘वादे वादे जायते तत्व बोध’ शीर्षकमा फेसबुकमा लेख्दै पार्टीको सचिवालय बैठकले प्रस्तुत गरेको विधान संशोधनको प्रस्तावलाई पोलिटब्युरो बैठकले सर्वसम्मत रुपमा स्विकारेको उल्लेख गरे । महासचिव पोखरेलले साउन ५ गते बस्ने केन्द्रीय कमिटीको बैठकमा यी प्रस्तावहरु पेश गरिने बताए ।

महासचिव पोखरेलले सचिवालय र पोलिटब्युरोका बैठकले पार्टीलाई थप एकताबद्ध बनाएर अघि बढाउने संकल्प गरेको उल्लेख गरेका छन् ।

उपमहासचिव ज्ञवालीले बैठकको समग्र परिदृष्यको चर्चा गर्दै विधानको बहसका विषयमा चौथो पोलिटब्युरो बैठक ‘कट अफ बैठक’का रुपमा रहेको उल्लेख गरेका छन् । उनले सचिवालयले विधान संसोधनका लागि पेश गरेको प्रस्ताव पोलिटब्युरो बैठकले महत्वपूर्ण सुझाव, टिप्पणी र रायसहित प्रस्तुत गरेको बताए ।

ज्ञवालीले बैठकमा अध्यक्ष तथा प्रधानमन्त्री केपी शर्मा ओलीले राखेका धारणाहरु पनि सार्वजनिक गरेका छन् । ‘पार्टी जीवनको लोकतान्त्रिकरणलाई सुविधा अनुसार खास बुँदामा होइन समष्टिमा बुझ्नुपर्ने, पार्टीको सुदृढ एकता र त्यसको बलमा पार्टीलाई निर्णायक राष्ट्रिय शक्ति बनाउँदै समृद्धि नेपाल, सुखी नेपालीको राष्ट्रिय आकांक्षा हासिल गर्नु आफ्नो एकमात्र उद्धेश्य रहेको बताउनुभएको छ ’ प्रधानमन्त्री ओलीको भनाइ उधृत गर्दै उपमहासचिव ज्ञवालीले सामाजिक सञ्जालमा उल्लेख गरेका छन् ।

२०७८ असोजमा भएको विधान महाधिवेशन र सोही वर्षको मंसिरमा भएको दशौं राष्ट्रिय महाधिवेशनबाट पारित विधानका बारेमा सार्वजनिक सञ्चारमाध्यम र सामाजिक सञ्जालमा भइरहेका भ्रामक प्रचारलाई बैठकले खारेज गरेको ज्ञवालीले उल्लेख गरेका छन् । ज्ञवालीले लेखेका छन्, ‘यस बैठकलाई कट अफ बैठकका रुपमा लिने र सिंगो पार्टी भावनात्मक एकताका साथ अगाडि बढ्ने संकल्प पनि बैठकले गरेको छ ।’

स्थायी कमिटी सदस्य भट्टराईले पूर्व राष्ट्रप्रमुखलाई राजनीतिमा पुन संलग्न हुने विषयलाई लिएर एमालेभित्र भाँडभैली मच्चाउने तत्वहरुलाई पोलिटब्युरो बैठकले निराश पारेको बताएका छन् । ‘यो बैठकले पार्टी एकताप्रति गहिरो प्रतिवद्धता जनाउँदै आगामी दिनहरुमा पार्टी अझ एकताबद्ध र सुदृढ भएर अघि बढ्ने मार्ग चित्र पनि प्रस्तुत गरेको छ’ भट्टराईले लेखेका छन् ।