घुस प्रकरणमा मुछिएका सामान्य प्रशासन मन्त्री गुप्ताले निजामती सेवा विधेयक राष्ट्रिय सभामा प्रस्तुत गर्दै

काठमाडौँ । घुस प्रकरणमा मुछिएका संघीय मामिला तथा सामान्य प्रशासन मन्त्री राजकुमार गुप्ता आज विवादित ‘संघीय निजामती सेवा विधेयक, २०८०’ माथि विचार गरियोस् भन्ने प्रस्ताव राष्ट्रिय सभामा प्रस्तुत गर्दै छन्।

दिउँसो १ बजे संघीय संसद भवन, नयाँ बानेश्वरमा बस्ने बैठकमा गुप्ताले प्रतिनिधि सभाबाट सन्देशसहित प्राप्त उक्त विधेयकमाथि विचार गरियोस् भन्ने प्रस्ताव पेस गर्ने कार्यसूची रहेको संघीय संसद्का महासचिव पद्मप्रसाद पाण्डेयले जानकारी दिए।

मन्त्री गुप्ता कर्मचारीको सरुवा रोक्न र नियुक्ति दिलाउन ७८ लाख रुपैयाँ घुसको डिल गरेको अडियो सार्वजनिक भएपछि चौतर्फी आलोचना खेपिरहेका छन्। विपक्षी दलहरूले उनको राजीनामा माग गरेका छन् भने प्रधानमन्त्रीले उनलाई तत्काल बर्खास्त गर्नुपर्ने आवाज पनि उठेको छ। एमालेका सांसदहरूले अडियोको सत्य तथ्यबारे तत्काल छानबिन गरेर मन्त्रीले संसदमा जवाफ दिनुपर्ने माग गरेका छन्।

यसै विषयमा मंगलबार संसदमा प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारमाथि सत्तालाई बिचौलियाको स्वार्थ र भ्रष्टाचारको संरक्षणमा चलाएको आरोप लगाएका छन्।