१६ नपुगी सञ्जालको माया र यौनजन्य गतिविधिले बदनाम, बयस्कका अर्कै छन् ‘छाडा’ काम

काठमाडौं– नाबालिगसँग शारिरीक सम्बन्ध राख्नु पनि अपराध मानिएको नेपालको कानुन लागु भएयता सेलिब्रिटीसम्मले पूर्पक्षका लागि थुनामा बस्नु परेको थियो।

पछि उनीहरू त निर्दोष साबित भए तर त्यसको कलंक कहिल्यै नमेटिने भयो। करिअरमा नै धक्का पुग्यो। काममा फर्किए पनि जुन गतिमा करिअर अघि बढेको थियो त्यसमा धक्का लाग्यो र घटनाका बाछिटाले बेलामौका घोच्ने समेत गर्छ। 

सेलिब्रिटी भएका कारण चर्चामा आएका घटनाबाहेक पनि प्रहरीमा यस्ता धेरै उजुरी आउने गरेका पर्याप्त उदाहरण छन्। अझ १६ नै नकटेका किशोरीलाई मायाजालमा पारी धोका दिने र फाइदा लुट्नेहरु प्रहरीका फन्दामा परेका कयन घटना छन्।

कंलकीको एउटा निजी विद्यालयको कक्षा १० मा अध्ययनरत १७ वर्षीया किशोरीलाई एउटा अपरिचित व्यक्तिको फ्रेण्ड रिक्वेस्ट आयो। केही ‘म्यूचल फ्रेण्ड’ पनि देखिए।

उनले एसेप्ट बटन दबाइन्। कुराकानी हुन थाल्यो। 

बानेश्वर बस्ने २४ वर्षीय युवकले कुराकानीका क्रममा उनलाई आफूले असाध्यै प्रेम गर्ने बताए। उनले विवाह गरेर घर लगी व्यवहार मिलाउने प्रलोभन देखाए। किशोरीले पनि उनको प्रस्ताव स्वीकारिन्।

कलंकीमा दुईबीच भेट भयो। युवकको घर जाने सर्तमा किशोरी त्यहाँ आएकी थिइन्। तर, युवकले उनलाई आफ्नो घर लाँदैनन् बरु नजिकैको ‘रोयल ड्रिम होटल एण्ड लज’ को १०३ नं. कोठामा लान्छन्। एक दिन त्यहिँ बस्ने प्रस्तावमा किशोरी तयार हुन्छिन्। भोलीपल्ट घर जाने कुरामा पनि राजी बन्छिन्।

त्यसरात उनीहरुबीच शारीरिक सम्पर्क भयो। दोस्रो दिन एकछिनमा आउँछु भनेर निस्किएका युवक फर्किएनन्। त्यसपछि किशोरीले आमालाई त्यो कुरा बताइन्। प्रहरीसमक्ष जोहरी गरियो। युवक पक्राउ गरी अदालतद्वारा पूर्पक्षका लागि थुनामा पुग्छन्।

सामाजिक सञ्जालमार्फत सम्बन्ध बिस्तार गर्ने र प्रेमको नाटकबाट यौनिक गतिविधि हुने क्रम अहिले पनि जारी रहेको बताइन्छ। यस्ता घटनाका कतिपय उजुरी साईबर ब्यूरोमा पर्ने गरेको छ। 

७ बर्षअघिसम्म नेपाल प्रहरीको साइबर ब्यूरो भर्खरै गठनको क्रममा रहेका बेला प्रहरी परिसर र अपराध महाशाखाले यस्ता उजुरी हेर्ने गरेको थियो। 

यहि क्रममा ललितपुरस्थित एक विद्यालयमा कक्षा १० मा अध्ययनरत किशोरीले आफ्नो नग्न तस्वीर भाइरल भएपछि प्रहरीलाई गुहारिन्। सुरुमा उनी आफूमाथि आइपरेको विपत वर्णन गर्न हिच्किचाइन्। तर, केहीवेरमै अभिभावकहरुबाट थाहा भयो, त्यो तस्वीर उनकै प्रेमीबाट ‘लिक’ भएको रहेछ।

अपराध अनुसन्धान अधिकारीहरुका अनुसार पीडित किशोरी र प्रेमीसँगै पढ्थे। उनीहरुबीच फेसबुकमा नियमित कुराकानी हुन्थ्यो।

त्यही क्रममा किशोरले नग्न तस्वीर पठाउन आग्रह गरेको प्रहरी अनुसन्धानबाट खुलेको थियो।

सुरुमा उनले इन्कार गरिन् तर, युवकले तस्वीर माग्न छाडेनन्। बरु सम्बन्ध तोड्न तयार थिए तर, नग्न तस्वीर माग्न छाड्नेवाला थिएनन्। अन्ततः किशोरीले गोप्य अंगहरुको तस्वीर सामाजिक सञ्जाल फेसबुकमार्फत पठाएकी थिइन्।

विस्तारै त्यो क्रम बढ्दै थियो। एक दिन किशोरको म्यासेन्जरबाट त्यो नग्न तस्वीर एउटा ‘च्याट ग्रुप’मा फरवार्ड भयो। केहीवेरमै तस्वीर भाइरल भयो। त्यो थाहा पाएकी किशोरी छागाँबाट खसेझैं भइन्। उनले अभिभावकलाई खबर गरिन्।

प्रहरीसमक्ष घटना पुग्यो। प्रहरीले पीडित किशारीका प्रेमीलाई पनि कार्यालयमा बोलायो। बयानका क्रममा उनले भूलवश ग्रुपमा  तस्वीर सेन्ड भएको दाबी गरे।

नग्न तस्वीर पठाउनु किशोरीको पनि गल्ती थियो। त्यसैले प्रहरीले कसरी अगाडि बढ्ने निक्र्यौल गर्न सकेन। दुवै परिवारले प्रतिष्ठाको विषयलाई पनि जोड दिएपछि फोटो डिलिट गर्न लगाइयो र अभिभावकको जिम्मा लगाएर छाडियो।

अचेल यस्ता गतिविधि सामाजिक सञ्जालको टिकटकमा पनि व्यापक हुने गरेको छ। लाइभमा बसेर बयस्कहरुले नै यौनजन्य कुराकानी, गतिविधि गर्ने कामलाई निरन्तरता दिने गरेका छन्। 

साईबर ब्यूरोका एक अधिकारी भन्छन्,‘प्रहरीले भ्याएसम्म निगरानीमा राखेर कसरी बन्द गराउन सकिन्छ भन्ने पनि कदम चाल्छ। तर, न्यूनिकरण गराउनका लागि कठिन भएको जस्तो पनि लाग्छ।’

यहि क्रममा काठमाडौंकै एक १५ वर्षीया किशोरीको फेसबुकबाटै एक युवकसँग चिनजान भयो।

कुराकानीका क्रममा उनीहरु नजिकिए। १९ वर्षीय युवकले उनीविना बाँच्नै नसक्ने बताउन थाले।

दोलखा घर भइ चाबहिल बस्दै युवकले एक दिन उनलाई घुम्न जाने बहानामा कोठामा लगे। उनीहरुबीच शारीरिक सम्बन्ध भयो। युवकले कोठामा भएको गतिविधिको भिडिओे मोबाइलमा कैद गरेको थाहा पाएपछि किशारी आत्तिइन्।

उनले भिडिओे डिलिट गर्न लगाइन्। तर, उनले मानेनन्। उल्टै अर्को सर्त राखे, ‘फेरि एकपटक कोठामा आउनुपर्छ अनि मात्र हटाउँछु।’ युवतीसँग उनले जे भने त्यही मान्नुको विकल्प थिएन। तर, एक दिन जब उनको ‘च्याट बक्स’मा त्यो भिडिओे आयो, तब ती युवकप्रति उनको झिनो विश्वास पनि रहेन।

अन्ततः परिवारसम्म यो कुरा पुग्यो। प्रहरीमा जाहेरी दर्ता भयो। घटना अदालतसम्म पुग्यो।

यीबाहेक वैदेशिक रोजगारीमा रहेका कतिपय युवती र युवकले अहिले टिकटकमा ‘छाडा’ बोल्ने, यौनजन्य क्रियाकलाप गर्ने भिडिओहरू पनि छ्याप्छ्याप्ती बन्न थालेका छन्। 

प्रहरी अधिकारी भन्छन्,‘यस्ता गतिविधि रोक्नका लागि सम्बन्धित सामाजिक सन्जालका प्रतिनिधि कार्यालयले सेन्सर नगरेसम्म कानुनी कारबाहीले मात्र न्यूनिकरण हुन कठिन छ। कि, इन्टरनेट प्रदायक निजी र सरकारी कम्पनीको नियामक निकाले पनि सेन्सर गर्नुपर्छ।’