स्कटल्यान्डले नेपाललाई दियो ३ सय २४ रनको विशाल लक्ष्य

काठमाडौं - नेपाललाई आइसिसी क्रिकेट विश्वकप लिग-२ अन्तर्गत त्रिकोणात्मक एकदिवसीय शृंखलाको आफ्नो तेस्रो खेलमा घरेलु टोली स्कटल्यान्डले तीन सय २४ रनको लक्ष्य दिएको छ । 

डुन्डेस्थित फोर्टहिल क्रिकेट मैदानमा स्कटल्यान्डका कप्तान रिची बेरिङ्टनले टस जितेर ब्याटिङ गर्ने निर्णय लिए । निर्धारित ५० ओभरमा ६ विकेट गुमाउँदै स्कटल्याण्डले तीन सय २३ रन बनायो । 

तेस्रो विकेटका लागि चार्ली टियर र कप्तान रिचि बरिंघटनले ९४ रनको साझेदारी गरेपछि बलियो स्कोर बनाउन सक्यो ।   यस्तै पाँचौं विकेटको लागि रीचिले माइकल लेक्ससँग १२५ रनको सानदार साझेदारी गरेपछि स्कटल्यान्डले विशाल लक्ष्य दिएको हो । 

चौथो नम्वर क्रिजमा आएका रीचीले सतक बनाए ।  ११४ बलमा १०२ रन बनाएका उनलाई आसिफ शेखले रन आउट गराए । माइकलले ९६ रन बनाए । टियरले ६८ रनको योगदान गरेका थिए । 

नेपालका करण केसी र दीपेन्द्र सी ग ऐरीले समान दुई विकेट हात पारे । ललित राजवंशी  एक विकेट लिएका थिए । सोमपाल कामी,  सन्दीप लामिछाने र आरिफ शेख विकेट विहिन भए।  

नेपाल लगातार तेस्रो जितको लक्ष्यमा छ । यसअघि नेपालले स्कटल्यान्डलाई एक र नेदरल्यान्ड्सलाई पाँच विकेटले पराजित गरेको थियो ।