ओलीको निर्देशनविरुद्ध उम्मेदवार बने पुरी, युवा संघ महाधिवेशनमा मतदान गराउन बाध्य एमाले

काठमाडौं– एमाले अध्यक्ष तथा प्रधानमन्त्री केपी शर्मा ओलीदेखि महासचिव शंकर पोखरेल, जनवर्गीय संगठन समन्वय इञ्चार्ज भानुभक्त ढकालसम्मको प्रयत्न नमान्दै राष्ट्रिय युवा संघको नेतृत्वमा न्याय खोजेका सुमन पुरीको अडानका कारण १०औं महाधिवेशनमा मतदान हुने भएको छ।

जनवर्गीय संगठनको नेतृत्वमा ओलीको ठाडो आदेशका कारण लोकतान्त्रिक अभ्यासको घाँटी निमोठ्ने प्रक्रिया चलाइरहेका बेला युवा संघ महासचिव पुरीले अध्यक्षका निम्ति दाबी नछाडेपछि एमाले निर्वाचन गराउन बाध्य भएको हो। 

पोखरामा जारी १०औं महाधिवेशनमा ओलीलगायतका नेताको टीमका उम्मेदवार बनेर बर्तमान अध्यक्ष क्षितिज थेवे दोहोरिने तयारीमा छन् भने लोकतान्त्रिक अधिकारको प्रयोगका रुपमा पुरीको पनि प्यानलकै उम्मेदवारी हुने भएको छ। 

आइतबार ४ बजेदेखि ६ बजेसम्म मतदानका निम्ति निर्वाचनका कार्यक्रम प्रारम्भ भएको छ। पोखरामा एमाले जनवर्गीय संगठनको युवा दस्ताको महाधिवेशन चलिरहेको छ।

सहमतिका नाममा पुरीलाई दबाब दिनका लागि युवा संघका तत्कालिन अध्यक्ष राजीव पहारी, महेश बस्नेतलगायतका सयौं प्रयत्न असफल भए।
‘योग्यता भएको उम्मेदवार निर्वाचन प्रक्रियाबाट मात्रै छानिनुपर्छ। सर्वसम्मतीका नाममा नेतृत्व लाद्ने प्रयत्न गलत हो’, महाधिवेशनमा सहभागी एक नेताले भने।

यसअघि सहमतिका नाममा थेवेलाई अध्यक्ष घोषणा गरी शनिबार नै महाधिवेशन सक्ने योजना विफल भएको छ। पुरी समूहको बहुमत प्रतिनिधिले बन्दसत्रमा नाराबाजी गरेका थिए।

‘थेवेका नाममा सहमति हुन नसक्नु नै उनको नैतिक हार भैसकेको छ। अब निर्वाचनबाट आउने परिणामलाई त सबैले स्वीकार गर्नैपर्छ’, एक प्रतिनिधिले भने,‘जे भए पनि नेतृत्वले मनलाग्दी लाद्न खोजेको व्यक्ति पराजित हुनेछन्।’