लण्डन ब्रिज–सुनबर्षी र रतुवामाईको समृद्धिको पुल

ईश्वर दुलाल
मोरङ - कुनै समय थियो, जब बक्राहा खोला आसपासका बासिन्दाहरूको जीवनमा वर्षा सँगै त्रासको बादल मडारिन्थ्यो ।

बर्खा लाग्ने बितिकै खोला उर्लिन्थ्यो, बाढी आउँथ्यो, अनि खेतबारी र घर बगाउँथ्यो । न त शिक्षा, न त स्वास्थ्य, न त व्यापारमा सहजता–बाँच्न मात्र पनि संघर्ष गर्नुपर्ने अवस्था थियो ।

तर, समय फेरियो । गणतन्त्रको स्थापनासँगै स्थानीय तहहरूको निर्माण भएपछि सुनबर्षी र रतुवामाई नगरपालिकाका नागरिकहरूको जीवनशैलीमा अभूतपूर्व परिवर्तन आएको छ । यस परिवर्तनको केन्द्रबिन्दु बनेको छ –लण्डन ब्रिज ।

सुनबर्षी बजारदेखि बक्राहा खेलासम्मको दूरी अब केवल केही मिनेटको पैदल यात्रा बनिसकेको छ । बक्राहा खोलामाथि बनेको यो झोलुङ्गे पुलले नजिकका पालिकाहरुलाई मात्र होइन, आन्तरिक पर्यटकहरुलाई समेत आकर्षित गरेको छ । यो स्थान अब सामाजिक सञ्जालका लागि ‘फोटो स्पट’ बनेको छ । विशेषगरी युवा पुस्ता, पुलमा सेल्फी खिच्न र प्राकृतिक सुन्दरता अनुभव गर्न आउने गरेका छन् ।

आज, विद्यार्थीहरू जुनसुकै मौसममा पनि सहज रूपमा विद्यालय जान सक्छन् । व्यापारीहरूले पुलको दुबैतर्फ चटपटे, खाजा पसल र साना होटलहरू सञ्चालन गर्न थालेका छन् । करिब ५ देखि ७ परिवारहरूले प्रत्यक्ष रूपमा आम्दानी गरिरहेका छन् । अब पर्यटकहरूको आगमनसँगै स्थानीय हस्तकलाका सामग्री, मौलिक खाद्यवस्तुहरू र संस्कृतिको प्रदर्शन पनि हुने क्रम बढ्दो छ ।

यस पुलले केवल दुई भूभागलाई मात्र होइन, दुई जीवनशैलीलाई पनि जोडिदिएको छ । एकातर्फ पुरानो पीडादायी विगत, अर्कोतर्फ उज्यालो सम्भावनाहरूले भरिएको भविष्य ।

लण्डन ब्रिज आज विकास र पर्यटनको प्रतीक बनेको छ । अब न त खोला पार गर्ने डर छ, न त शिक्षा र व्यापारमा बाधा । यो पुल एउटा यस्तो माध्यम बनेको छ, जसले सुनबर्षी र रतुवामाई नगरपालिकालाई समृद्धिको यात्रातर्फ उन्मुख गराएको छ ।