गभर्नर नियुक्ति विवादमा अल्झिए प्रधानमन्त्री ओली र देउवा, प्रचण्ड हिँडेको हिँडै

काठमाडौं– नेपाली कांग्रेसका महामन्त्री गगन थापाले ठोकुवा गरेर सोमबार भनिदिए,‘राष्ट्र बैंकको गभर्नर र हुनेवाला प्रधानमन्त्री कांग्रेसको हो।’

तर कांग्रेस सभापति शेरबहादुर देउवा र प्रधानमन्त्री केपी शर्मा ओली भने गभर्नर नियुक्तिको विवादमा अल्झिएका छन्। कांग्रेसलाई गभर्नर सुम्पिए पनि ओली निर्णयमा पुग्न सकेका छैनन्। यसले गठबन्धनमा तनाव रहेको संकेत पनि मिलेको छ।

यहि विवादका कारण सोमबारका लागि तोकिएको नियमित मन्त्रिपरिषद बैठकले पनि उचित निर्णयको निकास पाउन सकेन। 

उपप्रधान तथा अर्थमन्त्री विष्णु पौडेल अध्यक्षताको गभर्नर सिफारिस समितिको बैठक नबसेको भन्दै मन्त्रिपरिषद् बैठक राखिएन। 

गभर्नर सिफारिस र नियुक्तिबारे छलफल गर्न प्रधानमन्त्री ओलीले कांग्रेस सभापति देउवालाई बालुवाटार बोलाएका थिए। तर ७ बज्दासम्म सभापति देउवा पुगेनन्। 

कांग्रेसका विभिन्न तहका बैठकमा पछिल्लो समय गठबन्धन सही तरिकाले चल्न नसकेको भन्दै कुरा उठ्नसमेत थालेको छ।

सत्ता गठबन्धनमा खटपट चलेको भान भैरहेका बेला प्रमुख प्रतिपक्षी दलका नेता पुष्पकमल दाहाल प्रचण्ड भने पार्टी अभियानका लागि नेपालका विभिन्न ठाउँमा पुगिरहेका छन्। अहिले उनी पश्चिम नेपालको दौडाहामा लागेर आगामी निर्वाचनमा ०६४ जस्तै बहुमत ल्याउने बताइरहेका छन्।

‘स्पष्ट बहुमत नभएको दलका कारणले सरकार एउटाले मात्र चलाउन सकेको छैन। गठबन्धन गर्नुपर्दा भागवन्डा विवादले सत्ता नै अलमलमा छ’, उच्च स्रोतले भन्यो,‘यो बेला प्रतिपक्षलाई भने सहज जस्तो देखिन्छ। उसले अभियान चलाउन पाएको छ। अल्झिनु परेको छैन।’

प्रचण्डले सरकार नेतृत्व गुमाएपछि देशभर अभियान चलाइरहेका छन्। उनी हिँडेका हिँडै छन्। ‘मर्निङ वाक होस् वा पार्टीका कार्यक्रम, शहीदका घर होस् वा घाइते र बेपत्ताका परिवार भेट्ने अवसर जुरेको छ’, माओवादीका एक नेता भन्छन्,‘माओवादी अभियान र एकताको खाकामा हिँडेको छ। अब थप बलियो बनेर सदन छिर्ने मौकाको खोजी हो यो।’

प्रचण्ड सरकार गिराउँदै गत बर्षको असार १५ मा देउवा र ओलीबीच सहमति बनेको थियो। तर, एक बर्ष पनि नपुग्दै दुवैमा अविश्वास चुलिएको स्थितिलाई माओवादीले उपयोग गर्न खोजिरहेको छ। र त प्रचण्डले बेलामौका भन्ने गरेका छन्,‘हामी सरकारमा जान चहान्नौं तर परिस्थितिले परिवर्तन उल्ट्याउने अवस्था आयो भने काँध थाप्नुपर्ने हुन सक्छ।’