महिला क्रिकेटको यो जित कुनै आकस्मिक होइन, अडिग भएर अघि बढ्नुस्- पारस खड्का

काठमाडौँ - नेपाल क्रिकेट संघ (क्यान) का सचिव पारस खड्काले नेपाली महिला क्रिकेट टिमको आजको जित कुनै आकस्मिक परिणाम नभएको बताउदै महिला क्रिकेटलाई थप हौसलाको जरुरी भएको टिप्पणी गरेका छन् ।

पारसले सामाजिक सञ्जालमा टिप्पणी गर्दै क्रिकेट खेलेर के हुन्छ र ? भन्ने मानसिकता राख्ने जमातबीच ती सबै चुनौतीहरू पार गर्दै हुर्किएर महिला क्रिकेटमा लागेका 'बहिनीहरू' प्रति सम्मान र कृतज्ञता व्यक्त गरेका छन् ।

सचिव पारसले महिले क्रिकेट खेलाडीलाई आगामी दिनमा अझ अगाडी बढ्न आग्रह गर्दै  समाजमा रहेका नकारात्मक धारणा र प्रतिक्रियाहरूलाई बिर्सेर, राष्ट्रको प्रतिनिधित्व गर्दै आफ्नो जीवन यो खेलप्रति समर्पित गर्नु साँच्चै सजिलो नभएको बताएका छन् । 

पारसले भनेका छन्- 

“क्रिकेट खेलेर के हुन्छ र?” भन्ने मानसिकता राख्ने जमातबीच ती सबै चुनौतीहरू पार गर्दै हुर्किएर महिला क्रिकेट मा लाग्नु भएको बहिनीहरूप्रति सम्मान र कृतज्ञता । नेपालमा हाम्रा बहिनीहरूले क्रिकेट खेल्ने इच्छा राख्नु नै ठूलो कुरा हो, र अझै पनि ती सपनाहरू जीवित छन्।

समाजमा फैलिएका नकारात्मक धारणा र प्रतिक्रियाहरूलाई एकछिनको लागि बिर्सेर, राष्ट्रको प्रतिनिधित्व गर्दै आफ्नो जीवन यो खेलप्रति समर्पित गर्नु साँच्चै सजिलो कुरा होइन । त्यसैले नेपाली महिला क्रिकेट टिमलाई हामीले दिन सक्ने सबैभन्दा ठूलो समर्थन हो — हौसला।

सामाजिक सञ्जालमा गाली गर्नु सजिलो छ, तर मैदानमा दौडिनु त्यति सजिलो छैन । नेपाली महिला क्रिकेट टिमको आजको जित कुनै आकस्मिक परिणाम होइन, यो त तपाईंहरूले ब्याट र बल समातेको पहिलो दिनदेखि नै सुनिश्चित भइसकेको भविष्य थियो।
अडिग भएर अघि बढ्नुस् । आगामी दिनहरूका लागि हाम्रो राष्ट्रिय महिला क्रिकेट टोलीलाई हार्दिक शुभकामना ।