शिक्षक महासंघ फेरि रिसायो, सहमति लत्याएको आरोप लगाउँदै असहमति बुँदामा प्रकट गरिने

काठमाडौं– नेपाल शिक्षम महासंघले आन्दोलन रोक्नका लागि सरकारसँग गरेको सहमति लत्याउँदै विद्यालय शिक्षा विधेयकमा उपसमितिले तयार पारेको प्रतिवेदनप्रति असन्तुष्टि जनाएको छ।

प्रतिवेदनप्रति रिसाएको महासंघले बुँदागत रुपमा नै सहमति लत्याइएको विषयमा असहमति प्रकट गर्ने निधो गरेको छ।

शिक्षा, स्वास्थ्य तथा सूचना प्रविधि समितिमा उपसमितिले विधेयकको प्रतिवेदन तयार पारेको थियो।

आइतबार उपसमितिले विधेयकको प्रतिवेदन पेस गरेको थियो।

प्रतिवेदनले शिक्षकका माग सम्बोधन नगरेको महासंघका अध्यक्ष लक्ष्मीकिशोर सुवेदीले बताए। यद्यपि यो प्रतिवेदन समितिमा जाने भएकाले त्यहाँ सुधार नभए महासंघले निर्णायक चरणको फरक आन्दोलन गर्न सक्ने सुवेदीको संकेत छ।

कुन–कुन बुँदामा असहमति हो ती बुँदामा महासंघले आफ्नो धारणा सार्वजनिक गर्ने उनले बताए। त्यसका लागि महासंघले आधिकारिक धारणा सार्वजनिक गर्नका लागि सोमबार बैठक समेत डाकिसकेको छ।

गत चैत २० देखि महासंघले काठमाडौंमा २९ दिन लामो सडक आन्दोलन गरेको थियो। १७ वैशाखमा सरकारसँग सहमति भएपछि महासंघले सहमतिअनुसार ऐन जारी नभए आन्दोलन गर्ने चेतावनी दिएको थियो। 

१५ असारभित्र ऐन जारी गर्ने सहमति भएको छ। दर्ता भएको विधेयकभन्दा पनि प्रतिवेदन अनुदार र शिक्षक–कर्मचारी  विरोधी भएको आरोप अध्यक्ष सुवेदीले लगाएका छन्। अस्थायी प्रकृतिका राहत, साविक उमावि, अस्थायी करार, सिकाइ अनुदान, प्राविधिक धार,  विशेष शिक्षा लगायतका शिक्षकलाई पनि सहमति बमोजिम न्याय नगरेको महासंघको बुझाई छ।