कांग्रेस संसदीय दलको बैठकमा देउवाले सुनाउँदैछन् प्रधानमन्त्री ओलीको प्रस्ताव

काठमाडौं– नेपाली कांग्रेसको संसदीय दलको बैठकमा सभापति शेरबहादुर देउवाले प्रधानमन्त्री केपी शर्मा ओलीले गरेको नयाँ प्रस्ताव सुनाउने भएका छन्।

शनिबार दिउँसो २ बजेदेखि नयाँ बानेश्वरस्थित संसद भवनमा बैठक बस्न लागेको छ। 

आगामी बजेटका सन्दर्भमा कुराकानी हुने भनी डाकिएको बैठकमा उपसभामुख इन्दीरा राना मगरलाई हटाउने विषयमा प्रधानमन्त्री ओलीले कांग्रेस पदाधिकारीसामु राखेको प्रस्ताव देउवाले सुनाउन लागेका हुन्। 

ओलीकै प्रस्तावमा उपसभामुख रानामगरलाई पदमुक्त गर्नेबारे छलफल अगाडि बढेको हो । ती स्रोतका अनुसार उपसभामुख रानालाई पदमुक्त गर्ने प्रस्ताव कांग्रेसको पदाधिकारी बैठकसम्म पुगेको छ ।

२६ वैशाखमा बसेको पदाधिकारी बैठकमा गृहमन्त्री रमेश लेखकले यो विषय प्रवेश गराएका थिए। गृहमन्त्री लेखकले पछिल्ला राजनीतिक घटनाक्रम, एमालेसँगको सम्बन्ध, संवैधानिक निकायहरुमा रिक्त पदाधिकारी पदपूर्ति लगायतबारे जानकारी गराएका थिए।

ब्रिफिङकै क्रममा गृहमन्त्री लेखकले संवैधानिक निकायका पदाधिकारीहरुमा सिफारिस गर्ने संवैधानिक परिषद्मा कांग्रेसबाट सदस्य नभएको पनि बताएका थिए। सर्वोच्च अदालतमा विचाराधीन ५२ जना संवैधानिक पदाधिकारीहरुको सम्भावित फैसलाबारे पनि कुरा राखेका थिए।

सर्वोच्चले २८ जेठमा ५२ जना संवैधानिक नियुक्तिमाथि फैसला सुनाउँदा नियुक्ति बदर हुनसक्नेबारे पनि अनुमान बैठकमा प्रस्तुत भएको थियो। यदि ती पदाधिकारीको नियुक्ति बदर भए फेरि राजनीतिक भागबण्डाका आधारमै सिफारिस गर्नुपर्ने अवस्था आउनेबारे पनि बैठकमा छलफल भयो।

यसअघि कांग्रेस–एमाले गठबन्धन बन्नासाथ रानालाई पदमुक्त गर्ने विषयले चर्चा पाएको थियो। जहाँ रास्वपाले दलीय रुपमा नै यसको बिरोध गरेको थियो।