गत चैत मसान्तसम्मको अन्तिम मतदाता नामावली प्रकाशित, १९ हजार ८२२ जना बढे

काठमाडौँ - निर्वाचन आयोगले मतदाता नामावली अद्यावधिक कार्यविधि, २०८१ बमोजिम २०८१ चैत मसान्तसम्ममा १८ वर्ष उमेर पूरा भएका नागरिकहरूको विवरण प्रकाशित गरेको छ ।

आयोगले  २०८१ चैत मसान्तसम्ममा १८ वर्ष उमेर पूरा भएका नागरिकहरूको अन्तिम मतदाता नामावली प्रकाशन गरेको हो । जस अनुसार महिला मतदाता ८९ लाख १० हजार ८९६ र पुरुष मतदाता ९२ लाख ३७ हजार ५७२ तथा अन्य मतदाता १८६ गरी तत्काल जम्मा एक करोड ८१ लाख ४८ हजार ६५४ मतदाता अन्तिम मतदाता नामावलीमा समावेश रहेको आयोगले जनाएको छ । 

यसअघि २०८१ कार्तिक २६ मा प्रकाशित मतदाता नामावली अनुसार महिला मतदाता ८९ लाख ३ हजार १९७, पुरुष मतदाता ९२ लाख २५ हजार ४४८ र अन्य मतदाता १८७ गरी जम्मा एक करोड ८१ लाख २८ हजार ८३२ मतदाताको अन्तिम मतदाता नामावली कायम भएको थियो ।

विगतमा प्रकाशित मतदाता नामावलीभन्दा हाल प्रकाशित मतदाता नामावलीमा अन्य मतदाता एक जना घटी १८६ कायम भएतापनि महिला मतदाता ७ हजार ६९९ र पुरुष मतदाता १२ हजार १२४ थप भई जम्मा १९ हजार ८२२ जना मतदाता थप भएको आयोगले जनाएको छ । 

आयोगले आफ्नो मतदाता नामावली आयोगको वेवसाइट www.election.gov.np मा प्रकाशन गरिएको र सम्बधित मतदाताले हेर्न सक्ने जानकारी दिएको छ । 

साथै मतदाता नामावलीमा नाम नभएका र नागरिकता प्राप्त गरेका व्यक्तिले मतदाता नामावलीमा नयाँ नाम दर्ता गर्ने तथा मतदाता नामावलीमा नाम भएका मतदाताले आफ्नो विवरण अद्यावधिक गर्नुपर्ने भएमा अनलाइन तथा सम्बन्धित निर्वाचन कार्यालय मार्फत निरन्तर रूपमा गर्न सकिने समेत आयोगले जानकारी दिएको छ ।