FOLLOW UP : सैनिक कल्याणकारी कोष दुरुपयोग गर्ने पूर्वजमदारलाई जेल, जर्नेलसहितका अधिकारीलाई के?

काठमाडौं– नेपाली सेनाको सैनिक कल्याणकारी कोषको रकम दुरुपयोग गर्ने पूर्वजमदारलाई जिल्ला अदालत काठमाडौंले जेल चलान गरेको छ।

पूर्वजमदार आत्माराम थापालाई न्यायाधीश डा. दिवाकर भट्टको इजलासले आइतबार पूर्पक्षका लागि जेल चलान गरेको हो।

अदालतमा सैनिक ऐन अन्तर्गत मुद्दा दर्ता गरिएपछि सो निर्णय आएको हो  उक्त कोष हिनामिना प्रकरणमा संलग्नताको आशंकामा अवकास प्राप्त दुई सैनिक र बहालवाला दुई अधिकृतमाथि अनुसन्धान भइरहेको छ।

यहि प्रकरणमा दुई तारे जर्नेलसहितका अधिकारीमाथि नेपाली सेनाले कोर्ट अफ इन्क्वाइरी जारी राखेको छ।

सहायक रथी (ब्रिगेडियर जनरल) रोशन खड्का र सेनानी (मेजर) बोधराज कार्कीलाई सैनिक हिरासतमा राखी कोर्ट अफ इन्क्वाइरी प्रक्रिया अघि बढाइएको स्रोतले जनाएको छ।

प्रारम्भिक छानबिनमा उनीहरुको संलग्नता पुष्टि भएपछि कोर्ट मार्सल प्रक्रिया सुरु गरिएको बताइएको छ। 

कानूनी कारबाहीको दायरामा पर्ने दुईजना अवकास प्राप्त सैनिकमाथि भने प्रहरीले अनुसन्धान गरिरहेको छ।

जिल्ला प्रहरी परिसर काठमाडौंको अनुसन्धानपछि पूर्वजमदार थापासहित एक अन्य अधिकारीमाथि पनि जिल्ला अदालतमा मुद्दा दर्ता गरिएको छ। यद्यपि, अर्का अवकाशप्राप्त अधिकारी हाल अमेरिका पुगेको खुलेको छ । 

चारैजना सैनिक कल्याणकारी कोषमा कार्यरत रहँदा मिलेमतोमा सवा २ करोड रुपैयाँ हिनामिना गरिएको आरोप लागेको थियो। प्रधानसेनापति अशोकराज सिग्देलको निर्देशनका आधारमा जङ्गी अड्डाले कल्याणकारी कोषमा हानि गर्नेमाथि अनुसन्धान थालेको थियो।

यो पनि पढ्नुहोस् 

कल्याणकारी कोषको २ करोड बढी अपचलनमा सेनाका दुई तारे जर्नेल मुछिए, पूर्वजमदार पनि पक्राउ