गायिका एलिना चौहानको अभियान सफल होला? समिक्षासहित गृहमन्त्री लेखकलाई भेटिन्

काठमाडौं– गायिका एलिना चौहानले हातमा आएका कार्यक्रम छाडेर नै सामाजिक सञ्जालमा आफूमाथि गालीगलौज गर्नेलाई एक्स्पोज गरी कानुनी कारबाहीको बाटो समेत रोजेकी छन्। 

उनको यो अभियानमा प्रधानमन्त्री केपी शर्मा ओलीले पनि ‘सहासी छोरीहरू’ भनेर ढाडस दिएका छन्। 

यसपछि गायिका चौहान झनै उत्साही बनेकी छन्। उनलाई अर्की गायिका समिक्षा अधिकारीको पनि साथ रहेको छ।

एलिनाले प्रहरीको साइबर ब्यूरोमा केही माथि उजुरी समेत दिइसकेकी छन्। 

यहि क्रममा एलिना चौहान र समीक्षा अधिकारीले गृहमन्त्री रमेश लेखकलाई भेटेका छन्। सामाजिक सञ्जालमार्फत आफ्नो चरित्र हत्या भएको भन्दै उनीहरूले गृहमन्त्रीलाई भेटेर ध्यानाकर्षण गराएका हुन्।

एलिनाले सामाजिक सञ्जालमा स्टाटस लेख्दै यसबारे जानकारी दिएकी हुन्। लेखकसँगको तस्बिर राख्दै सहयोगका लागि धन्यवाद समेत दिएकी छिन्।

व्यक्तिगत जीवनमा आघात हुने, गालीगलौज र चरित्र हत्या जस्ता कार्यहरू सह्य नभएको समेत उनले उल्लेख गरेकी छिन्। 

आत्मसम्मानको रक्षा गर्न बाध्य भएर कानुनी प्रक्रिया अघि बढाएको समेत उनको भनाइ छ। 

केही दिनदेखि यी दुवैले आफूलाई गालिगलौच गर्नेको प्रोफाइल सामाजिक सञ्जालमार्फत सार्वजनिक गरिरहेका छन्।

उनको अभियान सफल होला या नहोला तर कानुनी कारबाहीका पनि विभिन्न प्रक्रिया उल्लेख त छँदै छन्। 

फेसबुक वा अन्य सामाजिक सञ्जालमार्फत गालीगलौज, बदनाम गर्ने, अश्लीलता फैलाउने वा धम्की दिने कार्य नेपालमा साइबर अपराधअन्तर्गत पर्छ। यस्ता कार्यमा संलग्न व्यक्तिलाई कानुनी रूपमा कडा कारबाही हुन सक्छ।

सार्वजनिक अपराध एउटा कानुन लाग्दछ। यदि कसैले फेसबुकमा कसैको चरित्र हत्या गर्ने, झुटो आरोप लगाउने वा अपमानजनक भाषा प्रयोग गर्छ भने ती व्यक्तिलाई पक्राउ गरेर जरिवाना वा कैद गर्न सकिन्छ।

अर्को, विद्युत् तथा सम्बन्धित प्रविधि अपराधको कानुन पनि लगाउन सकिन्छ। यससम्बन्धी ऐन २०६३ को धारा ४७ मा यदि कसैले कम्प्युटर, इन्टरनेट वा सामाजिक सञ्जालको माध्यमबाट अश्लील, डर त्रास फैलाउने, वा अपमानजनक कुरा पोस्ट गर्छ भने त्यसलाई ५ वर्षसम्मको जेल वा रु. १ लाखसम्म जरिवाना वा दुवै सजाय हुनसक्छ भन्ने उल्लेख छ।

तेस्रोचाहिँ गोपनीयता उल्लङ्घनको कानुन अन्तर्गत पनि कारबाही हुने व्यवस्था रहेको छ। कसैको निजी फोटो भिडिओ वा व्यक्तिगत विवरणलाई अनुमति बिना सार्वजनिक गर्नुलाई पनि अपराध मानिन्छ।

गालीगलौज, मानहानीमा    १ महिनादेखि १ वर्ष कैद वा ५ हजारदेखि १ लाखसम्म जरिवाना हुन्छ। 

यस्तै, धम्की, मानसिक पीडा दिने कसुरमा    ६ महिना देखि ३ वर्षसम्म कैद हुने व्यवस्था छ। यसैगरी अश्लीलता वा बदनाम गर्ने पोस्टमा १ बर्षदेखि ५ वर्ष कैद वा १ लाखसम्म जरिवाना हुने व्यवस्था छ।