चीनपछि युरोपेली संघले खोल्यो ट्रम्पविरुद्ध मोर्चा

काठमाडौँ - अमेरिकी राष्ट्रपति डोनाल्ड ट्रम्पले सुरु गरेको भन्सार कर युद्धको प्रभाव विश्वभर देखिन थालेको छ । अमेरिकाले चीनमाथि १०४ प्रतिशत कर लगाएपछि चीनले पनि प्रतिक्रियास्वरूप अमेरिकी उत्पादनहरूमा ८४ प्रतिशत कर लगाउने घोषणा गरेको छ । चीनपछि अब युरोपेली संघले पनि ट्रम्पविरुद्ध मोर्चा खोलेको छ ।

अमेरिकी राष्ट्रपति डोनाल्ड ट्रम्पले आयातित स्टील र आल्मुनियममा २५ प्रतिशत कर लगाएको प्रतिक्रियामा युरोपेली संघका सदस्य राष्ट्रहरूले २३ अर्ब अमेरिकी डलर बराबरका उत्पादनहरूमा प्रतिशोधात्मक कर लगाउने प्रस्तावलाई अनुमोदन गरेका छन् । युरोपेली संघको कार्यकारी निकाय युरोपेली आयोगले गरेको निर्णयमा समावेश गरिएका वस्तुहरूको सूची अझै प्रदान गरेको छैन ।  इयूका केही शुल्कहरू अप्रिल १५ बाट, केही मे १५ बाट र बाँकी डिसेम्बर १ बाट लागू हुनेछन् ।

यद्यपि, युरोपेली संघका २७ सदस्य राष्ट्रहरूले व्यापार समस्याहरू समाधान गर्न वार्ता सम्झौताको लागि आफ्नो प्राथमिकता दोहोर्‍याएका छन् । युरोपेली संघले अमेरिकी करलाई अनुचित र हानिकारक मानेको आयोगले जनाएको छ । जसका कारण दुवै पक्ष र विश्व अर्थतन्त्रले आर्थिक क्षति भोगिरहेका छन् । युरोपेली संघले अमेरिकासँगको वार्ताबाट सन्तुलित र पारस्परिक रूपमा लाभदायक नतिजा प्राप्त गर्ने आफ्नो स्पष्ट प्राथमिकता व्यक्त गरेको छ ।

युरोपेली आयोगकी प्रमुख उर्सुला भोन डेर लेयनले कार लगायत औद्योगिक सामानहरूमा शून्य भन्सारको बदलामा शून्य भन्सारको सम्झौताको प्रस्ताव गरेकी छिन् । यद्यपि, अमेरिकी राष्ट्रपति डोनाल्ड ट्रम्पले युरोपेली संघको यो प्रस्ताव अमेरिकालाई सन्तुष्ट पार्न पर्याप्त नभएको बताएका छन् ।