काठमाडौँ– अन्तराष्ट्रिय स्तरको सबैभन्दा लामो र्‍याफ्टिङ दौड प्रतिस्पर्धा ‘द ग्रेट कर्णाली क्वेस्ट’ कर्णाली नदीमा आयोजना हुने भएको छ । 

नेपाल एसोसिएन अफ राफ्टिङ एजेन्सिज(नारा), नेपाल नदी संरक्षण संस्था र कर्णाली बेसिन संरक्षण प्रतिष्ठानले आइतबार संयुक्त रुपमा काठमाडौँमा पत्रकार सम्मेलन गर्दै ‘द ग्रेट कर्णाली क्वेस्ट’ आगामी मार्च ८ देखि १३ सम्म कर्णाली नदीमा आयोजना हुने जनाएको हो ।

‘द ग्रेट कर्णाली क्वेस्ट’ अन्तर्गत दैलेखको आठविसकोट नगरपालिको रामक कर्णालीबाट कैलाली जिल्लाको दौलतपुरघाटसम्म पुग्दा २ सय ४८ किलोमिटरको दूरी पार गर्ने नेपाल नदी संरक्षण संस्थाका अध्यक्ष एवं द ग्रेट कर्णाली क्वेस्टका संयोजक मेघ घलेले जानकारी दिए । प्रतियोगीतामा १६ टोलीहरुका लागि आवेदन खुल्ला गरिएको र प्रत्येक टोलीको दर्ता शुल्क ४५० अमेरिकी डलर रहेको उनले बताए ।

प्रतिस्पर्धामा सहभागी भई टिमले आफ्नो क्षमता परीक्षण गर्ने, आफ्नो टिमवर्क, सहनशीलता प्रदर्शन गर्ने र विश्वका उत्कृष्ट र्र्‍याफ्टिङ टिमहरूसँग प्रतिस्पर्धा गर्ने अवसर पाउने आयोजकले जनाएको छ । त्यस्तै सबैभन्दा लामो राफ्टिङ दौडलाई गिनिज वर्ल्ड रेकर्डमा उल्लेख गरिने विश्वास आयोजकको रहेको छ ।