काठमाडौँ–  नेपाल क्रिकेट संघ (क्यान)ले टी–२० विश्वकपमा छनोट हुने राष्ट्रिय क्रिकेट टिमलाई पुरस्कारस्वरुप  ५० लाख रुपैयाँ नगद दिने निर्णय गरेको छ ।

आज सोमबार बसेको क्यानको बोर्ड बैठकले राष्ट्रिय टिमलाई ५० लाख रुपैयाँ दिने निर्णय गरेको हो ।

क्यानका सचिव पारस खड्काले आज एक जारी गरेकोे विज्ञप्तिअनुसार बैठकले एसीसी यू–१९ प्रिमियर कप विजेता टोलीका सम्पूर्ण सदस्यलाई जनही ५० हजार रुपैयाँ नगद पुरस्कार समेत दिने निर्णय पनि गरेको छ ।

बैठकले हङकङमा हुने महिला टी–२० आई सिरिजमा नेपाली राष्ट्रिय महिला टिमले सहभागिता जनाउने निर्णय पनि गरेको विज्ञप्तिमा उल्लेख छ । साथै, बैठकले विश्वकप छनोटको फाइनलमा नेपाल र ओमानबीचको खेलमा टिकटबाट उठेको रकमको ५० प्रतिशत रकम जाजरकोटमा गएको भूकम्पबाट भावितहरुलाई सहयोग गर्ने निर्णयसमेत गरेको छ ।

काठमाडौँमा भएको टी–२० विश्वकपमा छनोटको सेमिफाइनलमा यूएईलाई हराउँदै नेपाल आउँदो वर्ष अमेरिका र वेष्ट इण्डिजमा हुने विश्वकपमा छनोट भएको थियो । तर, फाइनलमा भने नेपाल ओमानसँग पराजित भएको थियो ।