लिग–२ को खेल सकेपछि त्रिदेशीय टी–२० अभ्यासमा नेपाल, टीम तिनै हुन्

काठमाडौं– आईसीसी लिग–२ का खेलहरू सके पनि स्कटल्यान्डमा नै रहेको नेपाली राष्ट्रिय टोलीले त्रिदेशीय टी–२० क्रिकेटको अभ्यास खेल खेल्ने भएको छ।

आइतबारदेखि स्कटल्यान्डको ग्लास्गोमा सुरु हुने त्रिकोणात्मक टी–२० मा नेपालले लिग–२ मा भिडेका तिनै स्कटल्यान्ड र नेदरल्यान्डससँग खेल खेल्दैछ। 
पहिलो खेल आइतबार स्कटल्यान्ड र नेदरल्यान्डसले खेल्दैछन् भने नेपालले सोमबार भिँड्नेछ।

खेल नेपाली समयअनुसार साँझ ६ः४५ बजे स्कटल्यान्डको ग्लास्गोमा सुरु हुनेछ। नेपालले भने आफ्नो पहिलो खेल भोलि सोमबार नेदरल्यान्ड्ससँग खेल्नेछ।

विश्वकप लिग–२ को आफ्नो चौथो शृंखला खेल्न स्कटल्यान्ड गएको नेपालले उतै टी–२० शृंखला खेल्न लागेको हो।

अभ्यासका क्रममा घाइते भएपछि सोमपाल कामी र गुल्शन झाले लिग–२ मा नेदरल्यान्ड्सविरुद्धको अन्तिम खेल गुमाएका थिए। उनीहरू टी–२० शृंखलामा समेत उपस्थित हुने छैनन्। लिग–२ मा बाहेक नेपाल क्रिकेट संघ (क्यान) ले लोकेश बम, किरण ठगुन्ना र रुपेश सिंहलाई टोलीमा राखेको छ।

लिग –२ को चौथो शृंखलामा नेपालले चारमध्ये तीन खेलमा जित निकालेको थियो। नेपाल १६ खेलबाट १२ अंकमा तालिकाको सातौं स्थानमा छ।

यसपछि यसैबर्ष विश्वकपको दुई पटकको बिजेता वेस्ट इन्डिजसँग पनि नेपालले अभ्यास खेल खेल्ने घोषणा भईसकेको छ।