काठमाडौँ– प्रधानमन्त्री एवम् नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’की धर्मपत्नी सीता दाहालको पार्थिव शरीरमा प्रतिनिधिसभाका सभामुख देवराज घिमिरे र राष्ट्रियसभाका अध्यक्ष गणेशप्रसाद तिमिल्सिनाले श्रद्धाञ्जलिअर्पण गरेका छन् ।
    
पार्टी कार्यालय पेरिसडाँडामा पुगेर उनीहरुले स्वर्गीय सीताको पार्थीव शरीरमा श्रद्धाञ्जली अर्पण गरेका हुन् । उनको उपचारका क्रममा आज विहान नर्भिक अस्पतालमा निधन भएको थियो ।
    
प्रतिनिधिसभाका उपसभामुख इन्दिरा रानाले पनि पेरिसडाँडा पुगी श्रद्धाञ्जलि अर्पण गरेकी छिन् । साथै नेकपा (एमाले)का उपाध्यक्षहरु सुवास नेम्वाङ्ग र विष्णुप्रसाद पौडेल, सचिव योगेश भट्टराईले पनि श्रद्धाञ्जलि अर्पण गरे । 

राष्ट्रिय प्रजातन्त्र पार्टीका अध्यक्ष राजेन्द्र लिङ्देनलगायतले श्रद्धाञ्जलि अर्पण गरेका छन् भने नेपाली सेनाका प्रधानसेनापति प्रभुराम शर्माले पनि पेरिसडाँडा पुगेर श्रद्धाञ्जलि व्यक्त गरे ।  

त्यसैगरी, नेकपा (माले)का महासचिव सिपी मैनाली, नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ र सोही पार्टीका पार्टी प्रवक्ता खड्गबहादुर विश्वकर्मा तथा नेपाल क्रान्तिकारी कम्युनिस्ट पार्टीका अध्यक्ष अध्यक्ष मोहन बैद्यले पनि श्रद्धाञ्जलि अर्पण गरेका छन् । हाल विभिन्न पार्टीका नेता तथा शुभचिन्तकहरु श्रद्धाञ्जली अर्पणका लागि पेरिसडाँडा पुग्ने क्रम जारी छ 

स्वर्गीय सीता माओवादी केन्द्रका सल्लाहकार समेत थिइन् । उनी लामो समयदेखि अस्वस्थ थिइन् ।