बाग्लुङको ढोरपाटन नगरपालिकाका मेयर खोज्न प्रहरी परिचालन, किन भए फरार ?

बाग्लुङ– बाग्लुङको ढोरपाटन नगरपालिकाका मेयर देवकुमार नेपाली बेपत्ता भएपछि खोज्नको लागि प्रहरी परिचालन गरिएको छ । जिल्ला प्रशासन कार्यालय बाग्लुङले मेयर नेपाली खोज्न प्रहरी परिचालन गरेको हो ।

मेयर नेपाली अध्यक्ष रहेको इमेज बचत तथा ऋण सहकारी संस्थाले बचतकर्ताको रकम फिर्ता दिन नसकेपछि मेयर नेपाली ३ दिनदेखि बेपत्ता रहेको जिल्ला प्रशासन कार्यालय बाग्लुङले जानकारी दिएको छ । बचतकर्ताको रकम फिर्ता नदिइ फरार रहेका नेपालीलाई खोज्न प्रहरी परिचालन गरिएको बाग्लुङका प्रमुख जिल्ला अधिकारी चित्रांगद बरालले जानकारी दिए ।

मेयर नेपाली २०७९ सालमा भएको स्थानीय तह निर्वाचनमा नेकपा एमालेबाट निर्वाचित भएका मेयर हुन् । यस्तै, २०७४ को स्थानीय तह निर्वाचन पनि उनी एमालेकै तर्फबाट मेयरमा निर्वाचित भएका थिए ।

सो सहकारीले कति बचतकर्ताको कति रकम फिर्ता दिन बाँकी छ भन्ने यकिन भएको छैन । मेयर नै संस्थापक र अहिले पनि अध्यक्ष रहेको सहकारीले बचत फिर्ता नदिएपछि बचतकर्ताहरु अहिले अन्योलमा परेका छन् । पीडित बचतकर्ता अहिले बाग्लुङ सदरमुकाममा जम्मा भएको प्रशासनले जानकारी दिएको छ ।