नवप्रवेशी भिक्षुहरूले गरे भिक्षाटन

कपिलवस्तु–भिक्षु जीवनमा प्रवेश गरेका ३ बढी नव प्रवेशी भिक्षुहरू बुद्ध शिक्षाका लागि प्राचीन कपिलवस्तुको तिलौराकोट आएका छन । उनीहरू शिक्षासहित तीर्थाटन गर्न बुद्धस्थल तिलौराकोट आएका हुन । २ साता अघि उनीहरूसहित ५ सय जना एकै पटक लुम्बिनीमा भिक्षु जीवनमा प्रवेश गरेका थिए ।

तिलौराकोट आएका उनीहरूलाई कपिलवस्तु नगरपालिका –३ का वडाध्यक्ष प्रकाश गैरे, वाटथाई मन्दिरका उपाध्यक्ष राजेश ज्ञवाली, निर्माण व्यवसायी दिनेश हमाल, व्यापारी देवेश जैसवालले भिक्षादान गरेका थिए ।  

भिक्षा ग्रहण लगत्तै उनीहरूले तिलौरकोटको पूर्वीद्वार लगायतका क्षेत्रको अवलोकन समेत गरेका थिए । शाक्यवंशीय राजधानी तथा राजकुमार सिद्धार्थ २९ वर्षको युवा अवस्था विताएको स्थल तिलौराकोट आएर नवप्रवेशीी भिक्षहरू विश्व शान्तिका लागि प्रार्थना र पाठ गरे । 

पूर्वको भोजपुरदेखि पश्चिमको कैलालीसम्मका ५ सय जनाले सामूहिक रूपमा प्रवज्या लिएर २ चैत्रमा श्रामनेर बनेका छन् । श्रामनेर भनेको भिक्षु जीवन प्रवेशको पहिलो खुटकिलो हो । 

भगवान गौतम बुद्धको अनुयायी बन्न पनि कठिन परिश्रम र संघर्षबाट मात्र हुन सकिन्छ भन्ने अनुभूति दिलाउन उनीहरूलाई पारिवारिक माया मोहबाट अगल राखेर केही दिनदेखि दिक्षा दिँइदै आएको छ ।  

नव प्रवेशी भिक्षुहरूलाई वुद्ध जीवनी, लुम्बिनीको इतिहास, बौद्ध शिक्षाको महत्ब र बुद्धले बुद्धत्व प्राप्त गर्दा पाएको कष्ट पीडाबारे जानकारी दिइएकोछ । त्यस्तै भिक्षु जीवन, करुणा, मैत्री सद्भाव र भाईचारा लगायतका विषयमा पनि ज्ञान दिइएको छ ।