सुर्खेत– नेपाली सेनाले कर्णाली प्रदेशको राजधानी सुर्खेतको वीरेन्द्रनगरमा एकताका लागि ‘रन फर युनिटी’ आयोजना गर्ने भएको छ ।
कर्णालीको पहिचानका रूपमा रहेको लामो दूरीको दौडको प्रवर्द्धन र खेलकुद क्षेत्रको विकास तथा राष्ट्रिय एकताको भावना अभिवृद्धिका लागि यही माघ २१ गते एकताका लागि दौड प्रतियोगिता हुने भएको हो ।
उत्तर पश्चिम पृतना हेडक्वार्टरद्वारा सेनाले गरेको अर्धवार्षिक कार्यप्रगति सार्वजनिक गर्दै आज एकताका लागि दौड प्रतियोगिता गर्न लागिएको जनाइएको छ । खेलकुद क्षेत्रको विकासमा थप टेवा, विद्यार्थी तथा खेलाडीहरूलाई हौसला प्रदान गर्दै राष्ट्रियता र संस्कृति जगेर्ना गर्ने माध्यमका रूपमा विकास गर्न प्रतियोगिता गर्न लागिएको सेनाले जनाएको छ ।
करिब एक हजारको सहभागिता रहने प्रतियोगितामा लामो र छोटो दूरीका दौडसहित पैदल यात्रा समावेश गरिएको छ । जसमा पाँच किलोमिटर पैदल यात्रा, पाँच किलोमिटर पुरुष महिला दौड र १० किलोमिटर पुरुष महिला दौड रहेका छन् ।
प्रतियोगितामा सर्वसाधारणदेखि खेलाडी, कर्मचारी, सुरक्षा निकायका कर्मचारी, विद्यार्थी तथा विभिन्न सङ्घसंस्थाले भाग लिन पाउनेछन् । पाँच किलोमिटर दौडमा प्रथम, दोस्रो र तेस्रो स्थान हासिल गर्नेलाई क्रमशः १० हजार, पाँच हजार, तीन हजार रुपैयाँ र १० किलोमिटरमा २० हजार, १० हजार र पाँच हजार रुपैयाँ नगदसहित प्रमाणपत्र प्रदान गरिनेछ ।
यस्तै उक्त दिन सेनाले युद्ध कौशल, हातहतियार, विपद् व्यवस्थापनमा प्रयोग हुने सामग्री, आर्टिलरी उपकरण, विविध सांस्कृतिक प्रस्तुति, सैनिक पुस्तकहरूको प्रदर्शनीसमेत गर्नेछ ।
