शिला पूजा गर्न जनकपुरधाममा भिड

जनकपुरधाम– भारतको अयोध्यामा निर्माणाधीन राम मन्दिरमा स्थापना गरिने मूर्ति बनाउनका लागि म्याग्दीको वेणीस्थित कालीगण्डकी नदीको किनारमा रहेको शिलालाई जनकपुरधाम पुर्‍याइएको छ ।

आइतबार देवशिलालाई देवी सीताको जन्मस्थल जानकी मन्दिर परिसरमा लगेर पूजा गरिएको हो ।

यसअघि नेपालको म्याग्दीको गलेश्वरधामलगायत धार्मिक स्थानमा लगेर पूजा, अर्चना गरिएको थियो । देवशिलालाई जनकपुरमा पूजा गरिसकेपछि अयोध्याका पु¥याउने गरी बिदाइ गरिने जानकी मन्दिरका पुरोहितले जानकारी दिए ।

भारत पठाउनका लागि ५ वटा शिला पहिचान गरिएकामा २ वटा शिला पठाउन लागिएको हो । भारत पठाउनुअघि परीक्षण गरिएका ती शिला ‘२६ टन र १४ टन’ तौलका छन् । भारत पठाउन लागिएका शिलाहरूको पूजा, आराधनाका लागि जनकपुरधाममा भक्तजनको भिड लागेको छ ।

शिलाको पूजाका लागि जनकपुरबासी उपस्थित भई रमाइलो गरिरहेका छन् । नेपालबाट शिला भारत लान लागेकाले आफूहरू खुसी भएको जनकपुरधामबासी बताउँछन् ।

यसले नेपाल र भारतीचको सांस्कृतिक सम्बन्धलाई थप मजबुत बनाउने उनीहरूको विश्वास छ । शिला बुधबारसम्म राम जन्मभूमिको ट्रस्टलाई जिम्मा लगाउने तयारी छ । 

कालीगण्डकीबाट पोखरा हुँदै शिलालाई विभिन्न धार्मिक स्थलमा पूजा गर्न राखिएको थियो ।