काठमाडौँ - देश प्रतिनिधि तथा प्रदेश सभा निर्वाचनमा होमिएको छ । तर साधारण जनताहरूमा भने निर्वाचनको लागी भनेर खासै उत्साह देखिदैन । चुनावको यस बिचमा पनि देश छाडेर विदेशीहरूको संख्या रोकिएको छैन् ।
उनिहरुलाई मतदान गर्नु भन्दा रोजगार नै प्यारो छ । देशमा रोजगारीको अवसर नभएको कारण विदेशिनु पर्ने आफूहरूको बाध्यता रहेको उनीहरू बताउँछन् ।
झापाका २७ वर्षीय प्रबिन मर्हजन त्रिभुवन अन्तराष्ट्रिय विमान स्थलमा वैदेशिक रोजगारको लागी जान भनेर पुगेका थिए । उनलाई छाडन उनको आमा र बुबा पनि साथमा थिए । उनी रोमानिया जाँदै छन् ।
रोमानियाबाट अरु देशको लागी पनि काम गर्न मिल्छ भन्ने उनले सुनेको बताए । उनलाई निर्वाचन पछि मात्र विदेश जाने इच्छा थियो तर त्यस अघि नै भिसा आएको कारण जानु पर्ने भएकोमा उनले बताए ।
राजनीतिक शास्त्रमा स्नातक तह पास गरेका उनको राजनीति तर्फ राम्रै ज्ञान छ । प्रबिनलाई पुरानो नेताहरू प्रति अलिकति पनि आशा नभएको तर पछिल्लो समय सक्षम युवाहरू पनि राजनीति तर्फ अगाडि बढेको देख्दा भने देशमा केही फरक देख्न सकिन्छ कि भन्ने आशा जागेको बताउँछन् ।
आफ्नो पालो कुरिरहेका अधिकांश युवाहरूको अनुसार नेताहरूले उही पुरानो भाषण नै कायम राखेर आफूहरूको आँखामा धुलो छेप्ने काम भइरहेको बताउँछन् । नेताहरूको पुरानै व्यवहार देखेर वाक्क भएका मतदाताहरू नेपालमा भविष्य नभएको बताउँछन् ।
चुनावको समयमा पटक पटक युवा स्वरोजगारको विषयहरू प्रमुख एजेण्डाको रुपमा उठाइने गरेको पाइन्छ । तर पनि देशमा युवाहरूलाई टिकाउन सकिने वातावरण बनाउनबाट सरकार चुक्ने गरेको छ । वैदेशिक रोजगार विभागको अनुसार यस वर्षको असोज महिनामा लगभग ६२ हजार ७ सय ६ जनाले वैदेशिक रोजगारीका लागि श्रम स्वीकृति लिएका छन् ।
सोलुखुम्बु घर भएका लाक्पा तामाङ आफ्नो परिवारसँग जानु अगाडि भावुक हुँदै थिए । उनको साथमा श्रीमती र छोरी पनि उनलाई छाडन भनेर आएका थिए । उमेरले ३४ पुगेका उनी कामको लागी दुबै जान लागेका छन् । उनी यो भन्दा अघिल्लो पटक पनि धेरै पटक विदेश जाँदै फर्कने गरेका छन् । उनले भोट दिनु एउटा सक्षम नागरिकको कर्तव्य हो भन्ने कुरा राम्रोसँग बुझेका छन् । तर देशमा रोजगारीको अभावको कारण भोट नदिई नै जानु परेको उनको भनाई छ ।
उही पुरानो भाषण नै कायम राखेर आफूहरूको आँखामा धुलो छेप्ने काम भइरहेको कारण भोट दिन पनि मन नलाग्ने गरेको वैदेशिक रोजगारमा जानको लागी पालो कुरेर बसिरहेका मतदाताहरू बताउँछन् । नेताहरूको पुरानै व्यवहार देखेर वाक्क भएको उनीहरुले नेपालमा भविष्य नभएको बताए ।
अधिकांश मतदातामा देशको राजनितिक अवस्था देखेर थकित भएको बताउँछन् भने केहीमा भने देशमा युवा नेतृत्व बढ्दै गएकोमा उत्साहित पनि देखिन्छन् । पुरानोलाई भोट हालेर केही प्रगति नभएकाे ठान्ने उनीहरुलाई नयाँसँग पनि खासै आस छैन ।
