काठमाडौँ - स्पेनिस लालिगा फुटबलमा रियल म्याड्रिडले मालोर्कालाई ३ - 0 को फराकिलो जित निकालेको छ । यो जितसँगै रियल म्याड्रिडले दोस्रो स्थानको सेभिल्लासँग १० अंकको अग्रता बनाएको छ ।

सोमबार भएको खेलमा पनि फ्रेन्च स्टार करिम बेन्जिमा चम्किएका थिए । पहिलो हाफ गोलरहित बराबरी भएको खेलमा रियलले ५५ औं मिनेटमा अग्रता लिएको थियो । बेन्जिमाको पासलाई भिनिसियस जुनियरले गोल गर्दै टीमलाई सुरुवाती अग्रता दिलाए।

रियलका लागि दोस्रो गोल बेन्जामाले पेनल्टी मार्फत ७७ औं मिनेटमा गरेका थिए । भिनिसियसमाथि फल भएपछि पाएको पेनल्टीलाई बेन्जिमाले सहज गोल गरेका थिए । ब्यक्तिगत दोस्रो तथा टिमका लागि तेस्रो गोल भने बेन्जिमाले ८२ औ मिनेटमा सम्भव बनाए । 

जितपछि रियलले लालिगामा उपाधि होड बलियो बनाएको छ । २८ खेलबाट रियलको ६६ अंक भएको छ भने समान खेलबाट दोस्रो स्थानको सेभिल्लाको ५६ अंक छ। 

पछिल्लो समय उत्कृष्ट फर्ममा देखिएको रियलले केही दिन अघि च्याम्पियन्स लिगमा दाबेदार पिएसजीमाथि नाटकीय पुनरागमन गर्दै  क्वाटरफाइनल यात्रा सम्भव बनाएको थियो।