व्यक्तिको आचरण शुद्ध भए, भ्रष्टाचार आफै अन्त्य हुन्छ : प्रधानमन्त्री

काठमाडौँ-  प्रधानमन्त्री केपी शर्मा ओलीले भ्रष्टाचार शून्यमा पुर्‍याउन आचरण शुद्ध हुनुपर्ने बताएका छन् । 

ललितपुरमा आज (शुक्रबार) आयोजित डिजिटल फ्रेमवर्क, २०२५ लाई सम्बोधन गर्दै प्रधानमन्त्री ओलीले यस्तो बताएका हुन् ।

उनले भ्रष्टाचार शून्यमा पुर्‍याउन सकिने तर त्यो कानुन कार्यान्वयनबाट मात्रै सम्भव हुने कुरा नरहेको बताए । त्यसका लागि मानिसको आचरण, चरित्र, गुणवत्ता वृद्धि गर्न जरुरी रहेको बताए।

मानिसको आचरण, चरित्र, गुणवत्ता वृद्धि गर्न शिक्षामा सुधार गर्न जरुरी रहेको बताए । गुणवत्ता बढाउने शिक्षा दिन जरुरी रहेको उल्लेख गरे । प्रधानमन्त्री ओलीले सामाजिक प्लेटफर्महरूमा राम्रो बाटो समाउन सके र अहिलेको प्रविधिको सही सदुपयोग गर्न सके राम्रो हुने बताए ।

प्रधानमन्त्री ओलीले भने, ‘भ्रष्टाचार शून्यमा पुर्‍याउन सक्छौँ । तर यो कानुन कार्यान्वयनबाट हुने कुराबाट शून्यमा पुर्‍याउन सकिँदैन । त्यसबाट मानिसको आचरण, चरित्र, गुणवत्ता विकास गरेर जानुपर्छ । मानिसले आफूलाई म गलत गर्दिन भन्ने प्रतिबद्धता लियो भने सबै समस्या समाधान हुन्छ ।’