संसद् बलियो हुँदा मात्र लोकतन्त्र बलियो बन्छः उपसभामुख राना

काठमाडौं -  उपसभामुख इन्दिरा रानाले संसद्को मजबूती नै लोकतन्त्रको आधार भएको बताएकी छन्। संसद् दिवसको अवसरमा सोमबार पूर्व सांसद मञ्चद्वारा आयोजित कार्यक्रममा बोल्दै उनले विधायिका बलियो र प्रभावकारी बनाउने प्रयास सबै सांसदहरूबाट सुरु हुनुपर्नेमा जोड दिइन्।

रानाले संसद्ले जनताको आवाज, आकांक्षा र आवश्यकता बोकेको संस्था भएकाले यसको प्रभावकारिता लोकतन्त्रको जीवन्तताको मापक हुने धारणा राखिन्।

ूसंसद्ले नीति, कानुन, योजना निर्माण र अनुगमनमार्फत शासन प्रणाली सञ्चालनमा महत्त्वपूर्ण भूमिका खेल्दछ, उनले भनिन्, लोकतन्त्र बलियो बनाउन संसद्लाई प्रभावकारी र जनउत्तरदायी बनाउनु अनिवार्य छ।

उपसभामुख रानाले संसदीय अभ्यासमा सुधार आवश्यक रहेको औंल्याउँदै संसद्को पारदर्शिता, जबाफदेहिता र जनउत्तरदायीपनलाई अझ सुदृढ बनाउनु पर्ने आवश्यकता उल्लेख गरिन्।

उनले संसद्को भूमिकालाई लिएर जनस्तरमा उठेका प्रश्नहरू समाधान गर्न संस्थागत सुधार र सांसदहरूकै व्यवहारमा रूपान्तरण आवश्यक रहेको बताउँदै संसद्को विश्वसनीयता जनताबीच बढाउनु पर्नेमा पनि जोड दिइन्।

संसद् बलियो भएन भने जनताको आवाज दबिन्छ, उपसभामुख रानाले भनिन्, त्यसैले संसदीय सर्वोच्चताको संरक्षण गर्न सबै पक्षको ध्यान जान जरुरी छ।

कार्यक्रममा पूर्व सांसदहरू, सरोकारवाला तथा विश्लेषकहरूको सहभागिता रहेको थियो।