पत्रकार पाठकविरुद्ध उजुरी दिएको आरजुको स्वीकारोक्ति, साईबर ब्यूरोले बताएको थिएन

काठमाडौं– पत्रकार दिलभूषण पाठकविरुद्ध साईबर ब्यूरोमा उजुरी दिएको परराष्ट्रमन्त्री समेत रहेकी कांग्रेस नेत्री आरजु राणाले स्वीकार गरेकी छन्। 

यसअघि जयबीर देउवाका विषयमा पाठकले समाचार प्रशारण गरेका कारण पक्राउ पूर्जी जारी भएको भन्ने खुलासा भए पनि औपचारिक रुपमा स्वीकार गरिएको थिएन। 

साईबर ब्यूरोले पनि उजुरीकर्ताको नाम खुलाउन मानेको थिएन। 

तर राणाले सामाजिक सञ्जालमार्फत नेपाल रिपब्लिक मिडियाकी निर्देशक शोभा ज्ञवालीलाई धम्की दिएको विषयको खण्डन गर्ने क्रममा पाठकविरुद्ध उजुरी दिएको स्वीकार गरेकी हुन्। 

उनले भनेकी छन्,‘हाम्रो परिवारलाई बदनाम गराउने दुसित मनासय सहित सामाजिक संजालमा आएको एक तथ्यहीन र भ्रामक भिडिओ र त्यसको न्यायिक निरुपणमा बारेमा उहाँसँग कुराकानी भएको हो।’

उनले अगाडि भनेकी छन्,‘उक्त भ्रामक र तथ्यहीन भिडिओ प्रशारण गर्ने संस्था कुनै पनि सरकारी निकायमा दर्ता समेत नभएको थाहा पाएपछि प्रेस काउन्सिल मार्फत प्रक्रिया सुरु गर्न नमिलेर हामीले राज्यको कानुन अनुसार नै न्याय खोजेका हौँ।’

उक्त भ्रामक भिडिओ पोष्ट गर्ने विरुद्ध अदालतले पक्राउ पूर्जी जारी गरेको छ र कानुनले जे सजायँ दिन्छ हामीले पनि त्यसैलाई अनुसरण गर्ने नै हो भन्ने राणाको तर्क छ। 

राणा जयबीरकी आमा हुन्।