यसरी भयो माओवादीमा दीपशिखाको ‘इन्चार्जसीप’ फेल

काठमाडौं– पछिल्ला दिनमा आन्तरिक लोकतन्त्रको हाँक दिने माओवादी केन्द्रीय सदस्य रामप्रसाद सापकोटा उर्फ दीपशिखाको इन्चार्जसीप असफल भएको छ।

असफल हुनुको उदाहरण उनी इन्चार्ज रहेको योङ कम्युनिस्ट लिग (वाईसीएल)को तेस्रो महाधिवेशनमा सहमतिका नाममा तयार पारिएको कार्यसमितिको पदाधिकारी संख्या हो।

सर्वसम्मतका नाममा एक अध्यक्ष, महासचिवबाहेक केन्द्रीय समितिको आकार नै पुग्ने खालको पदाधिकारी संख्या हो। 

‘यो त कहिँ नभएको जात्रा हाँडीगाउँमा भने जस्तो देखियो वाईसीएलमा’, एक प्रतिनिधि भन्छन्,‘कार्यसमितिभन्दा ठूलो पदाधिकारी संख्या राखेर पनि सर्वसम्मत भन्न सुहाउला र?’

माओवादीको पदतन्त्रको पूरा उदाहरण वाईसीएद पदाधिकारीमा देखिएको टिप्पणी हुन थालेको छ। जसको उदाहरण ७४ सदस्यीय पदाधिकारीमा २२ उपाध्यक्ष, १९ उपमहासचिव, ३१ सचिव हुन्। एक अध्यक्ष र महासचिवबाहेक सबैलाई पुग्नेरी पद बाँडिएको छ। 

यो पद बाँड्ने प्रस्ताव नै दीपशिखाले गरेको माओवादीनिकट स्रोतले जनाएको छ।

२२ जना उपाध्यक्षमा डम्बर पुलामी, ठाकुर सौराग, नवराज ऐर, सुदीप नगरकोटी, रामकुमार श्रेष्ठ, अविलास तामाङ, हरिप्रसाद ढकाल, माधव बस्नेत, मनोज बिक, प्रेम श्रेष्ठ, अरुण श्रेत्री, अर्जुनसिंह साउद, शंकर पौडेल, शैलेन्द्रकुमार शर्मा, मिमसरा बम, नविन खड्का, सन्तोष पनेरु, शोभाराम भण्डारी, अकिल शाही, मिना चैदरा र सुशिला कुँवर रहेका छन्।

‘यो के जात्रा देखाएको हो कुन्नी थाहा भएन’, माओवादीका एक नेता भन्छन्,‘आन्तरिक विवादमा चाँडै वाईसीएलको कार्यसमिति नै भंग हुन सक्छ।’
सम्बन्धित विभागको प्रमुखले आफ्नो जिम्मेवारी सम्हाल्न नसक्दा यस प्रकारको कमिटी बन्ने अनुभवी नेता बताउँछन्। ‘सकिन्न भने चुनाव गराउनेतिर लाग्नु पर्दथ्यो, यो त फाँटको इन्चार्जको काम हो नि। तर, यहाँ त नौटंकी पो देखाइएछ’, उच्च स्रोतले भन्यो।

केही समयअघि राष्ट्रिय युवा संघमा पनि यस्तै समस्या आउने देखिएपछि चुनाव गरिएको थियो। चुनावबाट क्षितिज थेवे अध्यक्षमा निर्वाचित भएका थिए।
वाईसीएल अध्यक्षमा पुष्प ओली र महासचिवमा गणेश शाहीलाई सर्वसम्मत गरिएको थियो।